Пред неполна година група на граѓани се појавивме со иницијативата „Јас барам“, каде што на претходната политичка гарнитура и поставивме шест клучни барања.
Меѓу барањата беа и „Департизација и враќање на функционалноста на државните институции како сервис на граѓаните“, „Осуда на насилството и негово соодветно санкционирање“, како и „Овозможување на медиумите да ги информираат граѓаните објективно без да се соочуваат со притисоци и насилство“.
Од собраните граѓани пред медиумите се обративме четворица, меѓу кои и Јане Лазевски (сега вработен во Министерството за надворешни работи), истиот Јане кој вчера му се закани на новинарот од ТВ21 -М, дека никогаш нема да добие интервју од министерот доколку постави прашање, на прес-конференцијата на Нимиц.
Очигледно е дека барањата од минатата година, сограѓанинот Јане само ги читал, но не и почувствувал или пак навистина се борел за нив. Неговата вчерашна постапка е доказ дека сега кога е во позиција на моќ ги користи истите алатки кои ВМРО-ДПМНЕ ги користеа 11 години.
Јане, не знам како не можеше, да извлечеш поука од ваквото однесување во изминатите 11 години, да ги земеш како пример за тоа како не треба и на крајот да ја оправдаш својата борба?
Особено како „граѓански активист“, твоето однесување кон јавноста треба да служи како пример. Сепак, разликуваме од партиските војници, нели?
Борбата на сите граѓан(к)и кои протестираа беше за создавање на функционална држава каде институциите ќе бидат отворени за граѓан(к)ите, овозможување на новинар(к)ите беспрекорно да можат да ја завршуваат нивната задача, држава каде сите подеднакво ќе бидат третирани. За жал, според твојата постапка, очигледно си се борел за нешто сосем друго.
Лани сите ние собрани граѓани – активист(к)и заедно со тебе Јане баравме разрешување на Зврлевски. Денска, ако никој друг, тогаш јас, барам твоја оставка, а доколку немаш намера да дадеш оставка, го повикувам Министерството за надворешни работо да донесе одлука за твое разрешување!