ВЕСТ НА ДЕНОТ
ЕУ воведе санкции за 86 физички и правни лица во Белорусија, вклучително и семејството на Лукашенко
Претседателот на Советот на ЕУ, Шарл Мишел официјално го потврди воведувањето на четвртиот пакет санкции против Белорусија. Во него се вклучени 86 физички и правни лица, напиша Мишел на својот профил на Твитер.
– ЕУ денеска испрати нов силен сигнал за поддршка на народот во Белорусија, воведувајќи нови ограничувачки мерки. Нашата порака до режимот веројатно не може да биде погрешно разбрана: да се ослободат сите политички затвореници, да се стави крај на секоја натамошна репресија и да се започне сеопфатен национален дијалог, се вели во соопштението.
ИЗЈАВА НА ДЕНОТ
– Ги цениме напорите да се решат нерешените прашања меѓу Северна Македонија и Република Бугарија. Тоа е навистина важно и нешто кон што повикуваме што се однесува до отворањето на самите преговори. Тука можам да го повторам она што го кажува раководството на ЕУ, се надеваме дека преговорите ќе се отворат што е можно побрзо, истакна евроамбасадорот Дејвид Гир.
ЦИВИЛНИ АКТИВНОСТИ
Европски вредности во Велес
ЦИВИЛ организира работилница во Велес на тема „Учество во креирање политики, јакнење на јавната свеста и промоција на европските вредности, мултикултурализмот и недискриминацијата на локално ниво“ што ќе се одржи на 22 јуни (утре), со почеток од 13 часот, во општинската сала.
Голем интерес за изборни набљудувачи на ЦИВИЛ
ЦИВИЛ бележи голем интерес за аплицирање за мобилни изборни набљудувачи за локалните избори 2021. Минатата недела, Организацијата ги повика своите членови, поддржувачи и учесниците на семинарите за граѓанско новинарство, набљудувачите на претходните изборни процеси, како и сите заинтересирани полнолетни граѓанки и граѓани да аплицираат за краткорочни изборни набљудувачи. Повикот во оваа фаза е отворен до 30 јуни на полноќ и ќе бидат избрани 150 набљудувачи.
Се интензивира долгорочниот мониторинг на ЦИВИЛ
ЦИВИЛ го интензивира долгорочниот мониторинг на изборниот процес во пресрет на локалните избори, предвидени за октомври годинава. Мониторингот ги опфаќа партиските и пропагандните активности, Државната изборна комисија, политичкото финансирање и работата на институциите во контекст на дополнувањата и измените во изборното законодавство.
ФЛЕШ ВЕСТИ
ПОДДРШКА Премиерот Зоран Заев, се сретна со Марија Виржиња Пина, амбасадорката на Португалија за нашата држава. Тоа, како што е констатирано, е случај со развојот на добрососедските односи со Грција и Бугарија, но и со сработеното во реформските процеси на домашен план, поради што, Португалија, како земја којашто претседава со Советот на ЕУ, цени дека Република Северна Македонија треба да биде дел од семејството на ЕУ.
КОВИД Министерот за здравство, Венко Филипче на денешната прес-конференција во Црвениот крст и Институтот за трансфузиона медицина истакна дека ситуацијата во земјава е мирна и дека за првпат на инфективната болница се примаат пациенти кои што имаат друго инфективно заболување, пренесува Слободен Печат.
АНТИКОРУПЦИЈА Николовски преку својот фејсбук статус информираше дека во наредните три дена, ќе се обидат заеднички да ги дефинираат приоритетите за борба против корупцијата и нелегалните финансии во земјите од Западен Балкан.
ПРАВДА Министерот за правда Бојан Маричиќ оствари средба со амбасадорката на Соединетите Американски Држави Кејт Брнз, на која беа дискутирани модалитетите за соработка во рамки на неодамна објавениот Меморандумот за воспоставување на борба против корупцијата на САД. Дополнително беше разговарана и Извршната наредба издадена од Претседателот Бајден, за лица кои дејствуваат против демократските вредности, а доаѓаат од Западен Балкан.
ЕКОНОМИЈА Нови 100 милиони евра добри земјава од Европската инвестициска банка (ЕИБ) наменети за поддршка на претпријатијата со договор што беше потпишан денеска.
СЛОБОДНА ЗОНА
„Половина од луѓето (испитаниците) не веруваат во демократијата. Според нив, има и други форми на владеење кои се исто толку добри, па и подобри од неа. Дали автократијата, тоталитаризмот, демархијата или анархијата се подобри форми на владеење? Диктатура? Воена или полициска хунта? Можеби некој облик на теократија, емират, султанат, монархија?“, пишува Џабир Дерала во денешниот ЕДИТОРИЈАЛ „Диктатурата е подобра од демократијата?“.
„Навикнати сме со години на соседите да им пречиме како се нарекувме, како си го нарекуваме јазикот на кој ние зборуваме (ние зборуваме, не тие) и слични навредливи изрази. Министри, европратеници, разни историчари со конкретни намери ни го окупираат вниманието. Можеби тие мислат дека не администрираат, а ние во заблуда потонати, лошо ја доживуваме нивната братска прегратка. Се повеќе сум убеден дека култивираноста на посетителите во пристојните кафеани е на многу повисоко ниво, од онаа што ја употребуваат политичките преставници на народите во балканскиот вртлог, на јавна сцена. Кога ја искоментирав изјавата на бугарскиот европратеник, пред еден ваков кафански состав, добив експресен одговор – остави го да паламуди, за тоа е платен“, пишува Војо Маневски во колумната „Паламудење“.
Дехран Муратов
