Дневен преглед на најважните настани во Република Македонија (23 јуни 2016 година): Јанкулоска и Грујевски на распит || Би-Би-Си со сторија за СЈО || Шекеринска со коментар за пресот на Ѓорге Иванов || Состанок на Работната група за Избирачкиот список || 430 евра казна за учесници во Шарената револуција || Граѓаните мора да се вклучени во преговорите || Прес на лидерот на СДСМ Зоран Заев
Јанкулоска и Грујевски на распит
Поранешната министерка за внатрешни работи Гордана Јанкулоска, ексначалникот на Петтата управа Горан Грујевски, и уште тројца вработени во Министерството за внатрешни работи, денеска се на распит во Кривичниот суд, за случајот “Тврдина”. Судијаката Александра Поп Стефанија ќе ги сослушува осомничените, иако претходно ја спореше надлежноста на Специјалното Јавно обвинителство, за овој случај. За време на распитот на Јанкулоска, судијката Поп Стефанија примила барање од Специјалното обвинителство за нејзино изземање од предметот „Тврдина“ – соопштија од судот. Поради тоа, судијката ги прекинала сослушувањата на повиканите лица.
Би-Би-Си со сторија за СЈО
Би-Би-Си со сторија за трите специјални обвинителки, со наслов „’Чарлиевите ангели’ кои се борат против вистинскиот криминал“. Во текстот пишува дека трите жени станаа страв за политичарите во Македонија, но и хероини на демонстрантите, кои, како што пишува Би-Би-Си, секој ден се собираат пред нивната канцеларија. Таа е една од најпознатите жени во Македонија, но до минатиот септември малкумина знаеја за Катица Јанева, јавен обвинител од Гевгелија, чија работа дотогаш се засновала главно на ситен криминал. Сега, таа е центарот на довербата во оваа турбулентна земја. Нејзината задача е да гони злоупотреба и корупција, произлезени од скандалот со прислушуваните материјали, пишува Би-Би-Си.
Шекеринска со коментар за пресот на Ѓорге Иванов
Во изјава за ЦИВИЛ Медиа денеска во Скопје, потпретседателката на СДСМ, Радмила Шекеринска, го оцени вчерашното обраќање на претседателот Иванов како згрозувачки лов на слободата, правото и еднаквоста на граѓаните. „Додека молчеше и седеше во кабинетот, луѓето се смееја, луѓето го критикуваа за неактивност, меѓутоа кога отвори уста, згрозеноста за ваквото сфаќање на политиката, на државата, не институциите, станува стандард“, оцени за ЦИВИЛ Медиа потпретседателката на СДСМ, Шекеринска.
Состанок на Работната група за Избирачкиот список
Државната изборна комисија го одржа првиот состанок на Работната група за Избирачкиот список. На состанокот присуствуваа претставници од институциите со кои соработува Државната изборна комисија, и четирите најголеми политички партии, Амбасадата на САД, Делегацијата на ЕУ, Мисијата на ОБСЕ и ИФЕС. Исто така, на првиот состанок на Работната група присуствуваа и претставници на граѓанските организации кои ја мониторираат работата на ДИК, и имаат акредитација за набљудување на изборите, ЦИВИЛ – Центар за слобода и МОСТ.
430 евра казна за учесници во Шарената револуција
На тројцата активисти, учесници во протестите на Шарената револуција во Штип, на синоќешните информативни разговори кои траеле до 22,00 часот, им била изречена парична казна од 430 евра. Како што за ЦИВИЛ Медиа, изјави Горан Трајков, еден од активистите, казните се поради прекршување на членот 27 од Законот за прекршоци против јавниот ред и мир, односно за боење на улициите во Штип.
Граѓаните мора да се вклучени во преговорите
Опозицијата денес, преку пресот на Зоран Заев, јавно и јасно се согласи граѓаните да бидат активно вклучени во преговарачкиот процес и најави дека ќе дејствуваат граѓаните да бидат директни учесници во решението на кризата. На ред се да се изјаснат странските дипломати кои ги иницираат и организираат разговорите и преговорите и останатите политички партии кои досега седеа на пржинските маси, вели Марјан Забрчанец.
Прес на лидерот на СДСМ Зоран Заев
Лидерот на СДСМ, Зоран Заев, на денешната прес-конференција, одговарајќи на новинарско прашање, рече дека спомнувањето на Армијата од претседателот Ѓорѓе Иванов е „сериозно и забегано“ и му порача „ни на крај памет да не му паѓа да го прави тоа“. „Граѓанската свест и активизам се нова вредност во Македонија. Прогонот врз активистите мора да прекине и да се слушне гласот. Ние ќе направиме сè што е во наша надлежост и тие да бидат дел од преговорите, и да учествуваат во решавањето на кризата. Борбата продолжува”, изјави Заев, кој најави дека опозицијата ќе го замрзне учеството во Собранието.
ЦИВИЛ го објавува овој преглед на настани со цел да придонесе кон објективното информирање за настаните и процесите, но и за настани за кои еден дел од медиумите во Република Македонија не информираат или информираат многу малку. Вашето мислење е важно за нас. Ве молиме, вашите коментари, сугестии, информации, фотографии и видео прилози испраќајте ги на нашата Фејсбук страница или на e-mail: [email protected]
