Меѓународниот ден на ненасилството, 2 октомври, воедно и роденденот на Махатма Ганди, е воспоставен со резолуцијата A/RES/61/271 на Генералното собрание на Обединетите нации од 15 јуни 2007, како можност „да се прошири пораката за ненасилство, вклучително преку едукација и јакнење на јавната свест“ и „да ја продлабочи политичката и општествена волја за обезбедување култура на мир, толеранција, разбирање и ненасилство“.
„Нашиот свет се соочува со сериозни предизвици: растечки нееднаквости, зголемени тензии, зголемени конфликти и влошување на климатскиот хаос. Гледаме и продлабочување на поделбите во земјите – со демократија под закана и говор на омраза и нетрпеливост. Можеме да ги надминеме овие неволји и да зацртаме пат кон посветла, помирна иднина. Ако разбереме – како што направи Ганди – дека разновидноста е богатство, а не закана. Ако инвестираме во социјална кохезија, негуваме храброст за компромис и решителност за соработка. Ако се осигураме дека сите ние – без разлика на статусот, потеклото, околностите или верата – можеме да живееме достоинствено, со еднакви можности и права. Ако се обединиме околу нашата заедничка хуманост“, се вели во овогодинешната порака на Генералниот секретар на ОН, Антонио Гутуреш.
Биди промената што сакаш да ја видиш во светот, ненасилството е „посилно од најмоќните оружја за уништување осмислени од генијалноста на човекот“, гради култура на мирот, толеранцијата, разбирањето и ненасилството, се дел од пораките што секоја година се упатуваат по повод Меѓународниот ден на ненасилството. Република Северна Македонија, како земја-членка на ОН е обврзана целосно да ја почитува оваа резолуција, промовирајќи го принципот на ненасилство.
ЦИВИЛ е една од ретките организации во земјата и регионот која на различни начини го одбележува овој светски датум, но и конкретно придонесува кон промовирање на ненасилството во општеството.
