Постојат безброј различни причини поради кои човек започнува да користи дрога, но крајниот резултат е речиси секогаш ист.
Малкумина ги негираат штетите од дрогите, а сепак, љубопитноста во однос на користењето на дрогите особено меѓу младите е на завидно ниво. Како една од најчестите причини се наведува оравдувањето дека сите други користат и дека сакаат да се вклопат во некои друштва, дека дрогата им помага во стресни ситуации, дека се љубопитни бидејќи ги гледаат на филмови на телевизија или дека не се зависни и дека може да се откажат кога сакаат.
Од страна на Генералното Собрание на Организацијата на Обединетите Нации, 26 јуни се смета за Меѓународен ден на борба против дрогата и нелегална трговија со наркотици, според резолуција донесена на 7-ми декември 1987 година.
Поттик за ова бил и зголемениот број на луѓе кои користат дроги, ризикот од употребата по нивниот живот, како и проблемите со кои се соочуваат најголемиот број земји во светот, како резултат на илегалната трговија со дрога.
Овој ден секоја година се одбележува со разни јавни дебати, акции и кампањи во организација на Организацијата за дрога и криминал при Обединетите нации.
Денес дрогите претставуваат значаен предизвик за целото општество, а особено за младите. Се смета дека во светот 200 милиони луѓе земале дрога барем еднаш годишно. Во светот постојат 25 милиони луѓе кои се зависни од дрога. Секоја година во светот 200.000 луѓе умираат од болести поврзани со употребата на дроги.
Според Европскиот извештај за дрога 2018 , Естонија, Шведска, Норвешка, Ирска, Велика Британија и понатаму се со највисоки стапки на смртност од предозирање во Европа, според бројките откриени во новата студија за дроги во ЕУ.
Ирска е рангирана како четврта највисока земја во Европа кога станува збор за смртни случаи со предозирање предизвикани од дрога, заедно со Обединетото Кралство и зад Норвешка, Шведска и Естонија.
Трговијата со дроги е сè уште најпрофитабилниот бизнис во светот, поврзан со организиран криминал. Дрогите проникнуваат во економиите низ светот со милијарди евра поврзани со перење пари и корупција.
Илегалната употреба на дрогата ги прави корисниците неприфатени од општеството, и таа влијае на квалитетот на животот. Стигмата и дискриминацијата кон овие лица е значително изразена.
Најзасегнати со проблемот на употреба на дрогите се младите, кои најчесто од љубопитство и под влијание на нивните врсници започнуваат да експериментираат со дрогите, незнаејќи до каде употребата на дроги може да ги доведе во животот.
Македонија по шести пат се вклучува во кампањата „Поддржи. Не казнувај.“ која се одржува по повод Меѓународниот ден за борба против дрогите.
По повод оваа кампања Здружението ХОПС – Опции за здрав живот Скопје организира панел дискусија: „Рекреативна употреба на дроги“, која има за цел преку отворена дискусија да ги опфати најбитните моменти од употребата на дроги од социјален, културен, здравствен и правен аспект, како и практиките за намалување на штети.
А. Петровска
