Технолошката компанија Мета, сопственик на Фејсбук, Инстаграм и ВатсАп, најави дека ќе отпушти околу пет отсто од вработените со најниски резултати во компанијата, а нејзиниот извршен директор Марк Цукерберг им кажа на вработените во интерен меморандум дека 2025 ќе биде „интензивна година“.
Според извештајот за последниот квартал, Мета вработила околу 72.000 луѓе, така што намалувањето на работните места за пет проценти ќе влијае на околу 3.600 лица, пренесува МИА.
Засегнатите вработени ќе бидат известени до 10 февруари.
„Одлучив да ја подигнам границата на управувањето со перформансите и побрзо да ги исфрлам оние со слаби перформанси“, рече Цукерберг.
Компанијата претходно елиминираше 21.000 работни места или речиси четвртина од својата работна сила, во 2022 и 2023 година, пренесува Си-Ен-Би-Си.
Мета тогаш посочи дека отпуштањата биле неопходни за да се подобри ефикасноста откако компанијата вработила премногу луѓе за време на пандемијата на коронавирус, објавија медиумите.
