ЦИВИЛ МЕДИА направи ексклузивно интервју со министерот за здравство Венко Филипче, во кое тој одговори на неколку жешки прашања од областа на јавното здравство. Министерот одговара на прашања поврзани со скандалите кои го потресуваат Министерството: реагенсите, инсулинот, триаголникот Министерство за здравство – фармација „Пановски“ – Клиника за хематологија… На министерот Филипче му се предочи фактот дека наследеното девастирано здравство никако не мрднува од мртва точка.
„Во овој момент има родители со болни деца во рацете кои се беспомошни во лавиринтите на ова и вакво здравство“, му беше кажано на министерот.
ЦИВИЛ МЕДИА го праша министерот за здравство кој е одговорен за овие тешки состојби и каков лек нуди Филипче како доктор и како министер и во која временска и финансиска рамка.
Постојат оддели како Неврохирургија во Градската болница кои функционираат со само еден единствен доктор! Прашањата до министерот Филипче во врска со ова беа: Колку вакви одделенија има во земјата? Не е ли тоа противзаконски, имајќи го предвид фактот дека за 24-часовно дежурство се потребни најмалку 6 доктори?
И медицинските сестри почнаа да учат германски, а веќе одамна недостасуваат анестезиолози, додека младите специјализанти почнаа да протестираат… Министерот беше прашан како планира да го спречи одливот на медицински кадар од земјата. Кој тогаш ќе работи во новиот Клинички центар? Дали е вистина дека локацијата за изградба на овој центар е пренаменета од Злокуќани во Петровец? На што се должи оваа одлука?
Исто така, министерот Филипче беше прашан дали потпишал договор во четири очи без тендер за штипскиот бункер за акцелератор, додека штипската болница и понатаму стагнира со изградбата. Му беше поставено и прашањето за штетните договори направени од претходната власт, од кои најголема штета трпат јавното здравство и буџетот…
За сите овие и низа други прашања, говореше министерот Филипче во интервјуто за ЦИВИЛ МЕДИА што ќе биде објавено во текот на утрешниот ден.
М. Л.
Фотографија: Биљана Јордановска
