Координаторот на пратеничката група на СДСМ, Јован Митрески вели дека на лидерската средба ќе се зборува за европската иднина на земјата, односно за сите прашања поврзани со евроинтеграцијата, а не само за уставните измени.
Во гостувањето во „Само вистина“ тој повтори дека сите партии се согласни дека стратешка цел е членство во ЕУ.
-Ќе се зборува за влегувањето на Бугарите во Уставот, но сите партии што сме определени за ЕУ треба да разговараме на една таква средба. Лидерската средба, покрај претседателите на партиите, ќе биде со учество и на пратениците или претставници на пратеничките групи. Поканети се сите што се определиле за евроинтеграцијата, истакна Митрески.
Тој кажа дека барањето за внес на Бугарите во Уставот во минатото било всушност барање на Скопје, а не на Софија.
-И пред ние да бидеме на овие позиции, во 90-тите, 2001-ва, па мислам и во 2018 година, било наше барањето Бугарите да бидат внесени во Уставот, но тогаш Бугарите не сакале да бидат внесени во Уставот. Според нив, тие ни ја признаваат државата, но велат дека станува збор за еден народ во две држави. Вака, со уставните измени, ќе се разграничат двата народа, македонскиот и бугарскио во Уставот, рече Митрески.
Со уставните измени се разграничуваат македонскиот и бугарскиот народ, Мицкоски не беше против ова
Ако ги вратите изјавите на Мицкоски од јули, тој кажа дека нема никаков проблем за внесувањето на Бугарите во Уставот, рече координаторот на пратеничката група на СДСМ, Јован Митрески во гостувањето во „Само вистина“.
Тој се надева ВМРО-ДПМНЕ да даде поддршка за уставните измени.
-Никој во нашата држава немаше против вклучувањето на Бугарите во Уставот. Така се прави разграничување меѓу македонскиот и бугарскиот народ, рече Митрески.
Според него темата на лидерската средба е европскиот пат на нашата држава и прашањето кое исто така ќе биде поставено е вклучувањето на Бугарите во Уставот.
Тој очекува ВМРО-ДПМНЕ, како што еднаш ги поддржало антикризните мерки, повторно да се „надминат“ во следниот период, бидејќи, како што вели, станува збор за сериозен период, но и за сериозна криза, која се чувствува секаде во светот, најмногу во Европа.
М. Д.
