„Графички центар“ е во стечај. Медиумската компанија „Медиа Принт Македонија“ (МПМ) како фирма ќерка на „Графички центар“, со вработените коишто останаа, поточно оние кои не се пријавија во новоформираната Медиа Принт ДООЕЛ, како што велат, нема веќе имот, па поради презадолженост ќе оди во стечај. На почетокот на неделава е објавена во Централниот регистар одлуката на Основниот суд Скопје 2 за отворање на стечајната постапка, а за стечаен управник е назначен Симон Михајлоски. Од над 60-те вработени во двата весника, кои веќе еден месец не се печатат, „Утрински весник“ и „Вест“, во Медиа Принт ДООЕЛ, преминале само 11. Другите се на платен список на МПМ, чекаат исплата на априлската плата, и ќе бидат прогласени за технолошки вишок.
„Не се пријавивме во Медиа Принт ДООЕЛ, зашто не можеме да работиме во тие услови коишто се нудат таму, со двајца уредници, со кои не може да се соработува, не се согласуваме ниту со уредувачката политика. А, години помиваме во МПМ, ги вложивме најплодните години од нашата кариера. За што? За на крајот, да бидеме технолошки вишок. Ете, до таму го доведоа новинарството во Македонија“, коментираат дел од новинарите, што сè уште се водат на платен список на МПМ.
Тие велат дека за телефонските сметки, со исклучок на неколкумина на кои им биле надоместувани по 500-600 денари – трошок, парите им биле задржувани од платата.
„Срамно беше тоа. Новинари што треба да работат и постојано да бидат во контакт, да се изложуваат на таков трошок. Но, при сила, нема правдина. Најстрашно беше што, парите коишто ни ги задржувале нам од плата, не ги уплаќале во Т-Мобиле! Не беше тешко тоа да се дознае, но за нас беше шок“, велат дел од новинарите коишто не се пријавија во новата компанија Медиа Принт ДООЕЛ.
Покрај парите од телефонските сметки и парите што им ги задржувале за ваучерите во „Тинекс“ маркетите, исто така, не биле уплаќани од компанијата.
„И ова не беше тешко да дознае. Кога дознавме што се правело со парите од телефонските сметки, решивме да провериме зошто од ‘Тинекс’, веќе одбиваат да пазарите со еден ваучер од 2.000 денари на одложено плаќање. Парите ни ги задржувале од плата, но, не ги уплаќале во фирмата. И што друго сѐ правело, не треба да се претпоставува. Ситуацијата е јасна, кога до тука е доведена работата!“, додаваат вработени во МПМ.
Од трите македонски весници што ги издаваше со години МПМ, само „Дневник“ и натаму има свое печатено издание. „Утрински весник“ и „Вест“ се сведени на сиромашни инфо-портали. Овие весници ќе останат запаметени по извонредните професионални трудови на македонски бардови во новинарството, но последниве години и по едностраната, провладина уредувачка политика, поради што многу новинари во битката за зачување на професионалноста, останаа без работа.
Распадот на МПМ го следат и бројните штрајкови на новинарите, кои со месеци не добиваа плата (наспроти управителката која била плаќана месечно – 25.000 евра!), по затворањето на дописничката мрежа и по силните притисоци врз новинарството. Сето тоа финишираше неславно – со прекин на издавањето на весниците-пионерите на македонското, плуралистичко дневно новинарство.
М. Талеска
