МВР поднесе кривична против директорката од Демир Хисар за одземање или уништување службен печат или спис

Министерството за внатрешни работи соопшти дека денеска ОВР Демир Хисар до ОЈО Битола поднесе кривична пријава против М.Ј. (57) од Демир Хисар за сторено кривично дело „одземање или уништување службен печат или спис“ по член 390 од КЗ.

Во периодот од 06.08.2025 до 13.08.2025 година противправно ги криела службените печати, сопственост на СОУ „Крсте Петков Мисирков“ од Демир Хисар, со што направила службените печати да бидат неупотребливи и со нив да не може да раководи новоименуваната директорка Ј.Д. (43), назначена за в.д. директор на СОУ „Крсте Петков Мисирков“ во Демир Хисар со одлука од страна на општина Демир Хисар од 05.08.2025“, соопштија од МВР.

На на 8 август полицијата изврши упад во домот на директорката на СОУ „Крсте Петков Мисирков“ во Демир Хисар, Маја Лозановска, при што се појавија видео снимки за односот на полицијата што предизвика бурни реакции во јавноста. Реагираше и СДСМ велејќи дека а „полицијата станува продолжена рака на ВМРО-ДПМНЕ, а жртви се граѓаните . Денеска е директорка на средно училиште утре некој друг“.

На 9 август по реакциите на јавноста поврзани со постапувањето на полициските службеници за време на претресот во домот на директорката на средното училиште „Крсте Петков Мисирков“ во Демир Хисар, Маја Лозановска, од МВР посочија дека Одделот за внатрешна контрола, криминалистички истраги и професионални стандарди презема соодветни мерки и активности од своја надлежност за што дополнително ќе биде известена јавноста.

Како резултат на истрага на Внатрешна контрола на 10 август МВР го разреши началникот од Демир Хисар за непрофесионално однесување.

На 12 август новинарите кои го следеа увидот во гимазијата во Демир Хисар беа легитимирани од полициските службеници, иако носеле новинарски легитимации. Од полицијата на новинарите им беше побарано да дадат лични карти зашто се воделе како непознати лица на настанот.

Б. Ј.