МВР до Основното јавно обвинителство поднесе кривични пријави против 24 лица вработени и волонтери во Министерството за земјоделство, шумарство и водостопанство, за кои постои основано сомнение за сторено кривично дело „Злоупотреба на службената положба и овластување“. Шест од осомничените се веќе лишени од слобода. Ова е исходот од акцијата на МВР и Обвинителството за гонење организиран криминал и корупција, спроведена во Скопје, Тетово, Валандово и Гевгелија.
Осомничените со своите незаконски дејствија што ги извршувале од 2011 до 2016, ги оштетиле Агенцијата за финансиска поддршка во земјоделството и руралниот развој и Буџетот, и противправно се стекнале со имотна корист, во вкупен износ од 13.698.297 денари или 222.736.54 евра.
Осомничените службени лица ја искористиле службената положба и овластување, пречекорувајќи ги своите ингеренции при склучување и раскинување на договори за закуп на земјоделско земјиште. При преземањето на незаконитите дејствија биле помогнати од останатите осомничени лица. Во исто време, одобрувале исплата по Програмата за финансиска подршка во земјоделството – субвенции, на кој начин прибавиле корист за повеќе правни и физички лица на штета на Буџетот.
„За парцелите кои што се спорни, барани се субвенции спротивно на законот. Барањата за субвенции во системот на Агенцијата за финансиска подршка во земјоделството и руралниот развој се внесувани од лице, што нема засновано работен однос во МЗШВ. Овие активности ова лице ги правело во координација со вработена на функција, раководител на Одделение за координација на подрачните единици во регионот Гевгелија“, соопштуваат од Министерството.