Мирјана Најчевска за ЦИВИЛ изјави дека со одлуката на Уставниот суд и на Собранието да го одложат датумот на изборите, конечно е исполнето едно од барањата на граѓаните кои протестираа – барањето да се одложат изборите. На прашањето дали ова е само уште еден трик на власта да нѐ врати во ситуација како онаа пред Договорот од Пржино, Најчевска вели:
„Јас не го делам тоа мислење. Сметам дека свикувањето на Собранието сепак е резултат на она што беше едно од основните барања на граѓаните, а тоа е да се добие време за да може да се започнат вистински промени и создавање на такви услови кои што ќе овозможат фер и демократски избори. Значи, свикувањето на Собранието го сфаќам како отстапка или условно кажано, победа на граѓанскиот сектор, со цел добивање на тоа потребно време. Тоа што на Собранието е повторно вратена соодветна ситуација која личи на онаа пред Пржино, со разрешување на министрите поставени од СДСМ и слично, е очекуван потег на оние кои се на власт и нешто со кое треба да се соочиме и да се справиме. Меѓутоа, еден чекор напред е направен, следниот чекор треба да биде поништување на аболицијата, и потоа да почнеме вистински разговори за реформски зафати.“
Најчевска смета дека одлуката на Уставниот суд за запирање на изборниот процес и усвојување на оставките на министрите, колку и да е противправна и политичка, сепак е отстапка пред барањата на граѓаните.
„Уставниот суд покажа дека апсолутно веќе ниту го почитува правото, ниту делува врз основа на правото, туку е обична алатка на политичарите. Тоа ни кажува дека во еден нареден период, прво нешто со кое треба да се зафатиме е реформирање на Уставниот суд. Меѓутоа, донесувањето на една ваква одлука, дури и на ниво на политичка одлука, е повлекување на Уставниот суд пред барањата на граѓаните“ – изјави Најчевска.
К.Г.
