„Најновите застрашувачки фото-факти од ослободените украински градови Буча и Ирпин покажуваат дека во моментов се случуваат злосторства против човештвото. Руските трупи во Украина не само што се борат против вооружените сили на Украина, туку и практикуваат тортура, егзекуции, па дури и палење цивили. Ова е вистински геноцид врз украинскиот народ и се случува токму сега, во 21 век! Мораме да го запреме ова заедно и никогаш да не дозволиме да се повтори каде и да може да се случи“, апелираат од Националниот Синдикат на новинари на Украина до странските новинари, пренесува Фронтлајн.
Тие повикуваат на будност и спремност новинарите да ги прикажат варварските злосторства на руските вооружени сили.
„Ние разбираме дека вашите земји живеат мирно и нема потреба од воена реторика. Но, од внатрешноста на војната, можеме да ве увериме дека војувањето е општ интерес на целиот слободен свет. Треба да дадеме сè од себе за да спречиме нови прекршоци, од каде и да доаѓаат. Засега заканата доаѓа од Русија и нејзините сојузници“, стои во апелот.
Повикуваат новинарите од светот да известуваат за агресијата, грозоморните гранатирања на станбени згради и безбројните воени злосторства што ги извршува руската војска.
„Ве повикуваме да продолжите да го привлекувате вниманието на светот на она што всушност се случува во нашата земја. Опколените и напатени градови Мариупол и Керсон, грозоморно гранатирање на станбени области во Харкив и безброј други воени злосторства што веќе ги изврши руската армија. Не смееме да дозволиме да се претворат во Трета светска војна. Сигурни сме дека вашето новинарско искуство, професионалните контакти и убедувачките вештини се од суштинско значење за откривање на вистината за грдото лице на војната“, стои во повикот од Националниот синдикат на новинари на Украина.
Потсетуваат дека нападот на руските сили е изграден врз пропаганда и дехуманизација од огромни размери кои се неприфатливи за целото слободно човештво.
„Целосниот воен напад на украинската територија продолжува, градовите и инфраструктурата постојано се на удар од воздух, море и копно. Под изговор за „демилитаризација“ и „деназификација“ на Украина, Русија има сосема други цели, уништувајќи цели градови и убивајќи невини цивили, вклучувајќи жени и деца.“, се наведува во апелот.
Новинарскиот синдикат посочува на бројни случаи на масовни убиства на цивили, силувања, грабежи, киднапирања и егзекуции на цивили кои се официјално потврдени од меѓународните институции како ОН. Русија, се прецизира во апелот, продолжува отворено да ги крши основните принципи на меѓународното хуманитарно право.
„Десетици колеги на светот му ја пренесуваат вистината за ужасите на војната во Украина по цена на нивниот живот и здравје. Многу од нив беа жртви на нападите. Светот мора да ја види реалноста. Ве молиме бидете тие што ќе помагнат да се открие. Почитувани новинари и медиумски работници од светските медиуми, Ние, Националниот синдикат на новинари на Украина, сакаме да ви се заблагодариме за поддршката на Украина, која ја чувствуваме во време на руска инвазија во нашата земја“, стои во апелот потпишан од претседателот на Националниот Синдикат на новинари на Украина, Сергиј Томиленко.
