Три ипол месеци по изборите, пратениците по втор пат се состанаа во Собранието, каде се одржува продолжението на конститутивната седница, на која што треба да се гласа составот на Комисијата за избори и именувања и да се избере нов претседател на парламентот, на местото на Трајко Велјаноски.
Состојбата во државата е речиси хаотична. Според лидерот на СДСМ, Зоран Заев, денеска по кратка постапка треба да се избре новиот претседател на Собранието, кандидатот на ДУИ, Талат Џафери. Но, пратениците од ВМРО-ДПМНЕ бараат откажување од т.н. Тиранска платформа. А, лидерот на ВМРО-ДПМНЕ, наместо да присуствува на конститутивната седница, отпатува од Македонија.
Додека голем дел од гласачкото тело очекуваше денешниот, да биде ден на почеток на одблокирање на политичката криза, не запираат протестите на членовите и симпатизерите на ВМРО-ДПМНЕ, под мотото„За заедничка Македонија“, а против т.н. Тиранска платформа.
Заев најави реформска влада, а Груевски отпатува од Македонија
Лидерот на СДСМ, Заев синоќа на интервју на една национална телевизија, блиска до ВМРО-ДПМНЕ, беше дециден дека во Македонија наскоро ќе биде формира реформска влада. Тој ги демантираше сите гласишта дека во коалиционата влада со албанските партии, при договарање на идните заеднички чекори, ќе има промена на Уставот, на знамето и на грбот, дека ќе има двојазичност на полициските униформи. Заев беше категоричен дека и покрај кроењето заговори од неговиот политички ривал Груевски, оти наводно, ќе ја снема Македонија, единствено „што ќе се случи е што, Груевски нема да биде веќе на власт.“
Столчето на лидерот на ВМРО-ДПМНЕ, Груевски денеска беше празно во парламентот. Тој со партиска делегација, како што соопшти партијата, отпатува на конгрес на Европската народна партија во Малта и таму ќе остане неколку дена. Но, екипа на емисијата „360 степени“, објави видео снимка од пристигнувањето на Груевски на аеродромот „Ататурк“ во близина на Инстанбул.
Македонската јавност е фрапирана и од фактот што, Груевски и по една година од неговата премиерска оставка, зазема централно место во дневниците на национални медиуми блиски до ВМРО-ДПМНЕ, каде дури и многу храбро, пред камерите, бара отчет од министрите во оставка. Според експертите, на овој начин Груевски испраќа јасна порака до јавноста дека и покрај формирањето на парламентарно мнозинство, тој и натаму има намера да раководи со државата!
Специјалното јавно обвинителство отвори нови истраги
Специјалното јавно обвинителство (СЈО) отвори четири нови истраги за четири лица. За осомничените во истрагите под работен назив „Табла“ и „Триста“ постои основано сомнение дека ја злоупотребиле својата положба и стекнале противправна имотна корист. Другите две истраги, „Тотал“ и „Тифани“, се однесуваат на даночно затајување. Осомничените го оштетиле буџетот на Република Македонија за 894.915 евра. Сите истраги произлегуваат од прислушкуваните разговори, од кои дел се јавно објавени.
Обвинителката, Катица Јанева пак, на Меѓународниот ден на укажувачите, побара поголема заштита на „свиркачите“, т.е. донесување на измените во Законот за заштита на сведоци, барања на СЈО доставени до Собранието уште минатата година.
Санкции за македонските лидери кои одбиваат да се реши политичката криза?
Медијаторите на Европската унија, како што пишува „Фајненшл Тајмс“, предупредуваат дека македонските политички лидери ризикуваат санкции, ако продолжат да ја блокираат новата влада и да разгоруваат меѓуетнички конфликт.
„Иванов доби предупредувања за слични санкции и минатата година, кога превентивно помилува десетици осомничени, идентификувани од Специјалната обвинителка, што ги истражува наводите за злоупотреби на Владата откриени на прислушуваните снимки. Груевски беше меѓу помилуваните, пред претседателот Ѓорге Иванов да ја повлече амнестијата, соочен со меѓународна осуда“, пишува „Фајненшл Тајмс“.
Европската „четворка“, Јоханес Хан, Едуард Кукан, Кнут Флекенштајн и Иво Вајгл упати јасни и директни пораки по средбите со лидерите на параламентарните партии во Скопје, дека мора да се почитуваат резулатите од неодамнешните избори. „Во една земја, секој мора да ги признае парламентарните мнозинства“, порачаа, посочувајќи и на претседателот Иванов, кој одлучи во тој период да престојува во Унгарија.
Моника Талеска