Денешната панел-дискусија „Има ли шанси отвореното општество во Македонија?“, во организација на Фондација отворено општество – Македонија, по повод одбележување на 25 години од нејзиното постоење и ангажман за граѓанското општество, беше посветенa на предизвиците и можностите за граѓанско делување и суштинско вклучување на граѓаните во креирање на политики на локално и национално ниво.
„На страна од заробената држава, ние имавме многу долго време и заробено општество. Толку долго имавме заробено општество што би рекол дека ние веќе немаме ни општество и дека одново треба да градиме некои основни вредности… Она што најмногу загришува во пострауматскиот период на Македонија е токму бавноста на правдата… Неказнивоста се уште е еден од главните белези за тоа што ни се случува во овој период… Постои опасност невладинот сектор во Македонија да се претвори во предворие на власта. Не зборувам за активстите што станаа дел од институциите на Владата… Зборувам за оној момент во кој голем број граѓански организации одвоија голем број човечки ресурси да станат дел од работни групи, совети кои помагаат на Владата да ги промени нештата во земјата. Колку и да укажува на транспарентна и отворена Влада, треба да бидеме многу внимателни и да не станеме на некој начин тампон зона меѓу тоа што значи власт и тоа што значи потреби на граѓанките и граѓаните во Македонија… Да не дозволиме да бидеме изговор за нивните неуспеси или да бидеме мултипликаторот на успесите“, изјави Џабир Дерала од ЦИВИЛ.
„Во едно конзервативно општество какво што е Македонија вие не можете да уживате добар имиџ кога зборувате за нешто што мнозинството не сака да го чуе… Една деценија заробена држава не научи дека алијансите, коалициите се клучна алатка за носење на општествени промени… “, изјави Ирена Цветковиќ од Коалиција Маргини.
„Една од клучните работи што треба да ги знаеме за тоа во какви услови егзистираат граѓанските организации е да го знаеме непобитниот факт во Македонија дека односот кон општеството на граѓаните е сериозно одреден од симпатизирањето на одредена политичка партија. Во таа смисла Македонија, за жал е сè уште хомогено општество“, рече Миша Поповиќ од Институт за демократија Социетас Цивилис .
„Ако се сеќавате невладиниот сектор бил коректив на Владата на СДСМ пред 2006 година… “, изјави Муслиу, осврнувајќи се повеќе на историјата на граѓанското општество во Македонија упатувајќи дека граѓанскиот сектор треба да биде секогаш активен и креативен.
Биљана Јордановска
