„Иако партиите генерално, имаа можност за слободно претставување на кампањите, се препорачува властите и политичките партии да преземат конкретни чекори за да не се врши притисок врз вработените од јавната администрација, врз политичките активисти и другите што ги посетуваат таквите настани, или пак, на самото гласање. Наводите за притисок треба темелно да бидат истражени“, се препораките што се наведени во извештајот на набљудувачката мисија на ОБСЕ/ОДИХР за предвремените парламентарните избори во Македонија на 11 декември минатата година.
За набљудувањето на начинот на кој медиумите известувале за кампањата, изборниот ден и постизборието, во извештајот се вели:
„Приватните телевизии Сител, Канал 5 и Алфа не обезбедија балансирано и непристрасно известување во своите вести, како што се покажа од квалитативните и квантитативните аспекти од известувањето. Трите канали беа фокусирани на двете главни коалиции, предводени од ВМРО-ДПМНЕ и СДСМ, кои вкупно добија од 88 проценти од медиумското покривање на Алфа, до 93 проценти на Канал 5. Иако коалицијата предводена од ВМРО-ДПМНЕ и коалицијата предводена од СДСМ беа рамномерно покриени, коалицијата предводена од ВМРО-ДПМНЕ беше претставена главно позитивно, додека коалицијата предводена од СДСМ беше често претставувана во негативно светло, особено на Сител. Сите три телевизии се фокусираа на пораките од кампањата на коалицијата предводена од ВМРО- ДПМНЕ. Сомнителни информации преземени од интернет повремено се пренесуваа како политички вести“.
Извештајот дава осврт и на настаните кои го одбележаа постизборниот период, со посебен акцент на протестите пред Државната изборна комисија.
„Постизборниот период беше одбележан со тензична атмосфера и остра реторика главно од ВМРО-ДПМНЕ. Откако Беса и СДСМ доставија приговори за нерегуларности на неколку избирачки места, ВМРО-ДПМНЕ повика на протести пред седиштето на Државната изборна комисија (ДИК). На 17 декември, лидерот на ВМРО-ДПМНЕ пред насобраните луѓе го претстави партискиот проглас и ја обвини ДИК и неколку амбасадори за мешање во изборите. Следниот ден, се појавија некролози на сегашни и поранешни претставници на меѓународната дипломатска заедница во Скопје. Мисијата на ОБСЕ/ОДИХР не е запознаена дали биле преземани какви било законски мерки против овие дејства“, стои во извештајот.