ЦИВИЛ – Центар за слобода продолжува со серијата јавни презентации на проектот „Општество без граници“. Во среда (26 април) со почеток во 12 часот, пред граѓанките и граѓаните на Велес, ЦИВИЛ ќе ја промовира „Граѓанската повелба“ – глобален документ за унапредување на граѓанските права и за активно учество на граѓаните во процесите на одлучување. „Граѓанската повелба“ претставува нов чекор на граѓанското општество во светски рамки, што се промовираше минатата година на Светската конференција за глобални перспективи одржана во Берлин, на иницијатива на Меѓународниот центар за граѓанско општество и повеќе реномирани светски граѓански организации.
Проектот „Општество без граници“ – ЦИВИЛ го спроведува со поддршка на германската Фондација „Хајнрих Бел“.
ЦИВИЛ беше една од првите 50 организации – потписнички на „Граѓанската повелба“ на светско ниво и ќе биде носител на промотивните и едукативните активности за Повелбата во Македонија.
За време на настанот во Велес ќе се организира детална презентација на сите активности поврзани со „Граѓанската повелба“ на светско и на национално ниво. Граѓанките и граѓаните ќе имаат можност да добијат информативни и едукативни материјали, како и да се приклучат кон поддршката за Повелбата, преку потпишување на изјава за поддршка или со учествување во фото и видео-петицијата која е прва од ваков вид, со што ЦИВИЛ за првпат ќе го воведе овој формат на поддршка во светски рамки.
