Откако полека се крева маглата која се беше надвиснала повеќе од потребното време, а некој многу добро ја искористи нејзината густина и најде можност за да се сокрие од сите нас, можам само да констатирам дека ни се разбистри и се расчисти небото над нас
Сите перипетии во изминатите неколку денови како да се изрежирани од најдобрите светски режисери, специјализирани за крими-шпионски трилери, со индиција за блокбастер и полнење на киносалите и на нивните благајни. Дотераното до перфекција и до најситен детал изрежирано бекство, за кое, верувајте ми, треба повеќе време за изработка на план, организација, инфраструктура, како и многу пари, моќни пријатели на влијателни места и секако, клучот од сѐ – точниот момент.
Сето ова се изреализира до степен на перфекција. Бегалецот стапи на сцена и остроумно, харизматично и решително, во нему својствен стил, ни ја намести таблата со шаховски фигури во играта во која тој го имаше првиот потег, бидејќи играше со бели фигури. И така, со нас – затечени, Мајсторот на занаетот на малата ложа, го искористи новиот бран што владее во нашето соседство и заедно со мајсторите на малку поголемата ложа од Белград и од Будимпешта, ни дадоа шах -мат.
Мајсторите – Орбан (кој беше жестоко критикуван во Европскиот парламент за неговиот однос кон бегалците и беше потсетен како тој самиот станал она што е сега, за сепак, да изгради Будимпештски ѕид како брана на „чистокрвна Европа“) и неговиот јужен колега Вучиќ, (носачот на гајби пиво, кој ја вооружи својата армија со нови руски „мигови„ и противвоздушни орудија, и на голема воена вежба демонстрираше моќ и играше казачок за инает на западноевропските држави, се разбира, пред се, затоа што некој се шета со глисери на Газиводе), му ги наредија елементите во сложувалката на мајсторот за бегство. Оној, кој цела деценија наназад им влегуваше под кожа и ги обезбеди како пријателчиња, за сега да ги изманипулира…
Асанж виси по балкони, а инкогнито гостинот се шета сам по улиците на Будим или на Пешта. Многу иритантно е Мајсторот да не остави порака, или пак, да не прати абер, па замислете, тој и тоа го направи: им порача – чардаш…
Со новата оска на видикот, за разоткривање на повеќегодишниот криминал и корупција во рамките на проектот за декриминализација и за разоружување на еден поранешен систем, веројатно ќе треба долго време. За виновниците на децениското опустошување да бидат зад решетки. И верувам дека во меѓувреме, барем ќе се обидеме да го промениме системот, затоа што тоа народот го заслужува. Јатаците и послушниците, полека но сигурно одат на „свирење клавир“, а верувам дека и Големиот маестро, кога ќе го почне концертот, ќе биде во новиот оддел за снимање на најдобриот звук, во мир, тишина и спокој, сѐ со цел да ја слуша музиката со внимание и без вознемирување.
А кога ќе шета по дворот, ќе црпи сила и ноти за новата опера – Ѕид.
