ЦИВИЛ – Центар за слобода организира панел-дискусија „Членството на Република Македонија во НАТО: Задачи, предизвици и можности“ на 8 февруари 2018 година, во хотел Сити Парк, со почеток во 13 часот. На панел дискусијата ќе говорат Министерката за одбрана, Радмила Шекеринска, Амбасадорката на Република Хрватска, Данијела Баришиќ, Националниот координатор за НАТО, Стево Пендаровски и политичкиот аналитичар, д-р Сашо Орданоски.
Во јавниот дискурс присутни се низа информации и дебати за тоа што значи членството на Република Македонија во НАТО од политички, безбедносен и општествен аспект. Иако информирањето поврзано со овој процес е редовно и обемно, потребни се постојани надградувања на нивото на информираност и вклученост на јавноста во овој процес.
Дали граѓанките и граѓаните на Република Македонија се доволно запознаени со тоа што значи НАТО, освен воен сојуз, односно, што сѐ подразбира членувањето во оваа Алијанса? Кои се задачите кои треба да се завршат во процесот на зачленувањето во НАТО, а притоа да не бидат повредени законите, Уставот и меѓународните стандарди? Дали спроведувањето на активностите во рамките на процесот гарантираат транспарентност на институциите и почитување на човековите права и слободи? Со какви предизвици се соочува процесот, а какви можности отвора за земјата? Кои се предизвиците со кои ќе се соочи земјата по влегувањето во НАТО Алијансата? Дали ризикот од тероризам ќе се зголеми или ќе се намали? Колку членството на НАТО ќе придонесе кон политичката стабилност и демократијата и дали ќе ги забрза интегративните процеси во општеството и во заедниците кои живеат во Република Македонија?
Тоа се дел од прашањата со кои ЦИВИЛ – Центар за слобода, како организација за човекови права, ќе се занимава и во иднина, а во тој домен одлучи да ја организира и оваа панел дискусија со учество на релевантни говорници на оваа тема.
На панел-дискусијата се поканети медиумите, претставници на граѓанското општество, институциите и сите заинтересирани граѓанки и граѓани. Прашања, ставови и согледувања можете веднаш да почнете да испраќате на овој линк. Дел од пораките ќе бидат веднаш објавени на медиумската платформа на ЦИВИЛ, а сите заедно ќе бидат претставени на самата панел дискусија, по исцрпувањето на дискусиите на присутните.
Настанот е во рамките на проектот „Слободни медиуми за слободно општество“, финансиран од Министерството за надворешни работи на Сојузна Република Германија.
