На мултимедијалниот и медиумскиот настан организиран од ЦИВИЛ и интегрираната редакција на Цивил Медиа „Перспективи 2023“, кој се организира секоја година, почнувајќи од 2017 година, се вкрстија голем број ставови, коментари и анализи на состојбите во 2022 година и перспективите во 2023 година.
На еден од шесте панели на „Перспективи 2023“ што се одржаа на 29 декември, учествуваше и Биљана Јордановска од ЦИВИЛ која дискутираше на темите избори и изборни процеси и зелени политики.
Оценка за 2022 година
„Она што ја одбележа 2022 година, со сите случувања од почетокот на годината, е призвукот на барањето на предвремени парламентарни избори од опозицијата, односно ВМРО-ДПМНЕ. Тие го искористија моментот со настаната економско-енергетска криза наметната од руската агресија врз Украина, гласањето за европскиот предлог за пристапните преговори за членство во ЕУ, ги блокираа законите битни за граѓаните, од кои тие зависеа. Се поставуваше и прашањето кога велат дека работат во интерес на граѓаните, на кои граѓани конкретно мислат“, изјави Биљана Јордановска во контекст на инсистирањето на опозицијата да излезе на избори, нудејќи ги како едно од решенијата за надминување на кризните состојби во земјата.
„Во Извештајот на Европската комисија за нашата земја во однос на зелените политики се препорачува да се работи на зелената транзиција. ЕУ генерално Зелената агенда ја става на високо ниво како една од главните приоритети, не само поради енергетската криза и пренасочување на ресурсите, туку последиците од климатските промени веќе ги гледаме и чувствуваме. Климатските промени и Зелената агенда не е нешто за кое зборувавме само 2022 година, туку е нешто за кое се збори и на кое се работи со години наназад“, изјави Јордановска во контекст на зелените политики.
Таа посочи дека Северна Македонија може да ја искористи циркуларната економија како чекор напред во решавање на зелените прашања.
Перспективи 2023
.„Во 2023 година се надевам дека оптимизмот на Владата ќе опстои, барам во исполнување на „сонот“ на ВМРО-ДПМНЕ за предвремени парламентарни избори. Сепак, кај нас сè е можно. Може да се случи нешто непредвидено што ќе биде тригер што ја ќе поттикне извршната власт да прифати предолг за предвремени парламентарни избори, со оглед на сите они е проблеми што се очекува да не следат и во 2023 година“, смета Јордановска.
Во контекст на изборните реформи, Јордановска истакна дека очекува во 2023 година да се работи на измени во Изборниот законик кој ќе биде првенствено во интерес на граѓаните како гласачи, иако нели првенствено се однесува на учесниците во изборниот процес, односно политичките партии и нивните кандидати за пратеници, градоначалници, советници или пак за претседател на државата.
„Се надевам дека и Министерството за животна средина и просторно планирање и самите пари што се вложуваат од ЕУ фондовите ќе придонесат опипливо да ги гледаме резултатите поврзани со зелените прашања и дека спроведувањето на законите, но и Зелената агенда ќе бидат на видливи. Во 2023 година ќе се посвети многу внимание на зелените политики, барем ЦИВИЛ тоа сигурно ќе го направи, особено на едукацијата“, истакна Јордановска.
Јордановска ја препорача и „Зелената читанка“ во издание на Грин ЦИВИЛ како едукативна и информативна публикација чија цел е, на лесно разбирлив начин, да се придонесе кон подобрување на нивото на знаење и зајакнување на јавната свест за зелените прашања и зелените вредности.
Перспективи 2023 се состоеше од шест панели со повеќе од десет учесници кои се емитуваа во живо на Јутуб видео каналот и на ФБ страницата на Цивил.
камера: Александар Ризински
монтажа: Ариан Мехмети