Во раните утрински часови на 24 февруари минатата година, кога руските тенкови влегоа во Украина, на светот му запре здивот. Русија се обидува да потчини независна европска земја и со сила се обидува да ги прекрои границите во Европа. Овие настани го означија почетокот на една нова ера. Мрачна војна на европско тло. Апсурдна, нелегитимна и нелегална агресија врз независна и суверена држава и невини луѓе, во 21 век, рече министерката за одбрана Славјанка Петровска на конференција „Украина – година на хероизмот“, на невладината организација за човекови права и слободи, ЦИВИЛ – Центар за слобода и Амбасадата на Украина во Република Северна Македонија.
„Му се поклонувам на украинскиот народ кој на светот му покажа дека љубовта кон сопствената татковина е посилна од оружјето на агресорот“, рече меѓу другото министерката Петровска.
Министерката истакна дека оваа невидена агресија во 21 век резултираше со одлучност не само на украинскиот народ туку и на заедништво и поддршка на Европа и Северноатлантскиот Сојуз.
„Ова е година на херојство во која украинскиот народ против целосната руска инвазија на Украина покажа што може за својата татковина. Но и година на единство и сојузништво на европскиот континент. Нашето единство е нашата најголема сила. Се трудеа да нè поделат, но го постигнаа токму спротивното. Ние сме пообединети и порешителни од било кога”, рече Петровска.
Министерката порача дека Северна Македонија водејќи се од принципите на почитување на меѓународното право покажа дека е цврсто посветена на поддршката и помошта на Украина.
„Нашата помош и поддршка ќе ги има се додека Украина и Украинскиот народ не го остварат своето право, слободно да се движат и живеат на сопствената територија. Помагаме и поддржуваме затоа што силно веруваме во меѓународните принципи, но пред се на правото на живот и слобода”, истакна Петровска.
Министерката се осврна на разорните слики, уништувањето и агресијата, кои и сама ги посведочи за време на својата посета на Украина. „Вчера се вратив од Украина и во мене носам различни чувства. Ужасеност, бес и тага за тоа што го видов. Разрушени домови, уништени детски градинки, детски игралишта“ – рече Петровска.
„Ова не е само борба на Украина ова е борба за одржување на целиот меѓународен поредок, кој се заснова на правила и принципи. Слободата нема цена, исто како што нема цена и нашата поддршка и помош за Украина“, заклучи Петровска.
Н.Абдурахмани
Камера: Атанас Петровски/Александар Ризински
Реализација и монтажа: Ариан Мехмети
Фотографија: Ангел Ангеловски/Биљјана Јордановска
