Израелскиот премиер Бенјамин Нетанјаху ги критикуваше плановите објавени од војската во неделата да одржува дневни тактички паузи во борбите долж еден од главните патишта што водат кон Газа за да се олесни испораката на помош за палестинската енклава.
Израелската армија најави дневни паузи од 5 до 16 часот во реонот на преминот „Керем Шалом“ до патот „Салах ал-Дин“, а потоа кон север, пренесува агенцијата „Ројтерс“.
„Кога утрото премиерот ги слушна извештаите за 11-часовна хуманитарна пауза, се сврте кон својот воен секретар и јасно стави до знаење дека тоа е неприфатливо за него“, рече израелски официјален претставник.
Армијата појасни дека нормалните операции ќе продолжат во Рафа, што е во фокусот на нејзината операција во јужниот дел на Газа, каде во саботата загинаа осум израелски војници.
Реакцијата на Нетанјаху ги истакна политичките тензии околу протокот на помош во Газа, каде меѓународните организации предупредија на растечка хуманитарна криза.
Министерот за национална безбедност Итамар Бен Гвир, кој ја предводи националистичката и религиозна партија во коалицијата на Нетанјаху, ја осуди идејата за тактички паузи, велејќи дека тој што ја донел одлуката е „будала“ што треба да ја изгуби својата работа.
Овој спор е последен во серијата судири меѓу членовите на коалицијата и армијата околу водењето на војната во Газа.
Тоа доаѓа една недела откако поранешниот генерал Бени Ганц поднесе оставка од владата, обвинувајќи го Нетанјаху дека нема ефикасна стратегија за Газа.
Н. Абдурахмани
