„Тврдокорните“ и останатите патриотски здруженија ќе протестирале пред Метју Нимиц и нема да дозволат Македонија во спорот за името да биде поразена. На помош во битката за името им се придружува и Обединета македонска дијаспора и други патриотски здруженија на нашите иселеници во светот.
Не даваат Македонија да биде поразена, а Македонија од осамостојувањето до сега стана синоним за пораз. Поразите станаа и една од основните белези на нашиот идентитет. Македонија почна со порази и во поразите е доследна до ден денешен. Ги изгуби скоро сите битки.
Ја изгуби битката за правична приватизација, ја изгуби битката за борба за социјална правда и човекови права, ја изгуби битката за правна држава иако има 25 правни факултети, ја изгуби битката за справување со сиромаштијата и невработеноста иако има 25 економски факултети, ја изгуби битката со организираниот криминал и корупција, ја изгуби битката за независно судство, ја изгуби битката со државната бирократија, ја изгуби битката со монополите, ја изгуби битката со заштита на животната средина ,ја изгуби битката за одржлив економски развој, ја изгуби битката младите да не ја напуштаат масовно државата, ја изгуби битката со бугарските пасоши и така можат да се редат пораз до пораз па дури и во спортот, замислете немаме ниту еден спортист што остварил олимписка норма.
Па добро ќе рече некој има и исклучоци. Точно има. Но, само како потврда на правилото дека поразите ни станаа секојдневие и константа и народот веќе отрпна на нив.
Е сега, откако се помиривме со сите горенаведени порази, сега не го даваме името и нема да дозволиме уште еднаш да бидеме поразени и понижени.
Отишол коњот ама оглавот не го даваме.
Овие „Тврдокорниве“, патриотските здруженија, оние кои се чувствуваат како антички Македонци, овие од ОМД кои и самите се дел од големите порази на Македонија, не знае човек дали да ги жали или да ги презира.
Нивните крокодилски солзи над судбината на Македонија нема да помогнат да се прокнижи уште еден голем пораз за Македонија. Сега барем со новото име ќе бидеме губитници со тапија која ќе важи и во земјава и во странство.
И се така до следниот пораз!
