Пад за едно место на ранг листата на Репортери без граници, бележи слободата на медиумите во Македонија. Од вкупно 180 рангирани земји на листата посветена на слободата на печатот, Македонија е на 118-тото место.
Во 2015-та година медиумските слободи во Македонија беа пласирани на место погоре, односно 117.
“Клевета беше отстранета од Кривичниот законик во 2012 година, но обвиненијата се заменети со граѓански постапки, со можност за големи парични и затворски казни за новинарите и за сопствениците на медиумите”, стои во причините поради кои Македонија е на 118-тото место. Тоа што најмногу загрижува е бројот на тужби за клевета.
“Најмалку 580 тужби за клевета се поднесени од крајот на 2014 година досега, неколку десетици од нив против новинари. Како резултат на тоа, според анкетата на Македонскиот синдикат на новинари и медиумски работници повеќе од половина од новинарите во Македонија велат дека се цензурираат”, е наведено во најновиот извештај за слободата во медиумите во 2015 година.
Рангирана на прво место е Финска, пред Холандија, Норвешка, Данска и Нов Зеланд. Полошо рангирани од Македонија, за 2015-та година се Кина, Сирија, Туркменистан, Северна Кореја и Еритреја која е последна на листата.
Сите држави од регионот се подобро рангирани споредено со Македонија. Албанија е на 82-ро место, Црна Гора на 106-то место, Бугарија на 113-то, Грција оваа година е на 89-то место, Босна и Херцеговина на 68-мо, Хрватска е на 63-то место, а Србија годинава е на 59-то место.
