Јавно сообраќајно претпријатие Скопје излезе со демант на фото-веста објавена на порталот skopje1mk на која се гледа расипан автобус на ЈСП Скопје, за кој се вели дека бил зафатен од пожар.
Во соопштението, ЈСП Скопје најостро го демантира како лажна вест текстот на порталот насловен skopje1mk, изнесувајќи дека содржината изнесена во текстот, во која се подвлекува дека „Утрово пред Бит пазар, се запали уште еден автобус“, не е проверена.
Од ЈСП ја сметаат за тенденциозна намерата да се претстави дека постојано имаме случаи на запалени автобуси по скопските улици, земајќи го предвид фактот дека просечната старост на автобусите е 13 години и оттука произлегува потребата за набавка на нови автобуси во возниот парк на ЈСП. Имено, станува збор за пареа, а не како наведеното дека се работи за пожар. Во истиот момент кога се случил дефектот (скинато црево за антифриз), возачот реагирал исправно по што бил спремен и го извадил ПП апаратот, но не го употребил, велат од ЈСП и бараат од порталот демантот да биде објавен во целост, а текстот за којшто се однесува, да биде повлечен.
На порталор skopje1mk денес се појави фото – вест дека утрово пред Бит пазар, се запали уште еден автобус. Навремената реакција по чадот од моторот – спречи катастрофа. Возачот излезе со две противпожарни боци со кои превенираше поголема катастрофа. Секојдневие по скопските улици стана да се гледаат расипаните автобуси. Речиси да нема ден, а да нема автобус кој со сервисна служба се шлепа до базите во Ѓорче и Автокоманда. Со ова се отвора прашањето: дали Скопје има безбеден превоз?
Веста од порталот беше поткрепена со 2 фотографии на кои се гледа расипаниот автобус со отворен поклопец од моторот и поголема количина непозната течност истечена на асфалтот под него.
Дали се работи за пареа или пожар, тоа засегнатите граѓани на СКопје не ги интересира, бидејќи автобусот секако е расипан и вон употреба, а Скопјани треба да се снаоѓаат во и онака редуцираниот број автобуси со кои располага ЈСП Скопје.
Post by @skopje1mkView on Threads
Автобусот е дел од набавката на кинески двокатни автобуси која до 2013 година ја реализираше Владата предводена од ВМРО-ДПМНЕ од кинескиот производител Јутонг, кој набрзо потоа престана да постои , а јавното обвинителство за за организиран криминал и корупција покрена обвинение против поранешниот генерален секретар на ВМРО-ДПМНЕ и екс-директор на ЈСП и актуелен секретар на Владата, Игор Јанушев, и поранешниот министер за транспорт и врски Миле Јанакиески, како и против уште две лица за набавката на кинеските автобуси.
Драган Мишев
