Медиумската слобода е клучен елемент во секое демократско општество. Таа подразбира право на новинарите да информираат слободно, без цензура, притисоци или страв од реперкусии. Слободата на медиумите овозможува транспарентност, одговорност на властите и учество на граѓаните во јавниот дискурс.
Во глобален контекст, медиумската слобода е под закана во многу земји, дури и во демократии каде што таа традиционално се сметала за загарантирана. Притисоците можат да бидат директни – преку закани, политички влијанија или економска зависност од центри на моќ – или индиректни, преку саморегулација од страв или зависност од реклами и државна поддршка.
Кога ја разгледуваме оваа појава во контекст на Северна Македонија, важно е да се напомене дека медиумската сфера се наоѓа во процес на трансформација, под влијание на повеќе фактори: политички транзициски процеси, економски предизвици, регионални и меѓународни притисоци, како и дигиталната еволуција на новинарството. Дополнително, законската рамка постои, но прашањето е колку таа се применува во пракса.
Меѓународните организации како „Репортери без граници“ и ОБСЕ редовно ја следат состојбата и укажуваат на слабости како што се концентрацијата на медиумската сопственост, нетранспарентноста во финансирањето, злоупотребата на судски тужби против новинари (т.н. SLAPP тужби) и недоволната заштита од закани и притисоци.
Македонија според Индексот за слобода на медиумите на „Репортери без граници“ 2025 се најде 42 место, со пад од 6 места.
Вашето мислење е важно. Како вие го разбирате ова прашање?
Редакција ЦИВИЛ Медиа ги повикува сите заинтересирани граѓанки и граѓани да одговорат на ова, но и на претходните прашања на денот во коментарите на објавата.
Некои прашања се деликатни, така што, освен во коментари, секогаш постои можноста да се биде анонимен, па одговорите на Прашањето на денот да се даваат анонимно, во порака на месинџер или на другите онлајн контакти на ЦИВИЛ.
Најдобрите одговори ќе бидат објавени во посебен прилог.
Сите прашања на денот може да се најдат во рубриката ФОРУМ на интернет весникот ЦивилМедиа.
Редакција ЦивилМедиа
