ВМРО-ДПМНЕ јавно да се извини и да се огради од својата пратеничка Велика Стојкова-Серафимовска за искажани навреди кон Бошњаците, бараат пратениците Санела Шкријељ и Зеќир Рамчиловиќ од СДСМ. Нивното барање е откако Стојкова-Серафимовска од собраниската говорница на седницата на 16.07.2022 обраќајќи и се Шкријељ рече дека има „збунет идентитет“ и „не знае што е“.
“… Ќе добиете деца и младина и иднина со збунет идентитет, каков што е Вашиот идентитет колешке, очигледно Вие сакате да имате наследници како Вие што сте во моментов, и нашите поколенија и нашите генерации да не знаат што се, да не знаат што се како вие што не знаете што сте”, рече пратеничката Стојкова Серафимовска, (аплауз од пратеничката група на ВМРО ДПМНЕ).
„Согласно Деловникот за работа не беше во можност да се јави никој за реплика (ниту јас, ниту Санела Шкријељ), но на овој начин сакаме јавно да реагираме и да го осудиме навредливиот говор кон Бошњаците на пратеничката Велика Стојкова Серафимовска која преку директно обраќање кон пратеничката Шкријељ го покажа својот став кон Бошњаците!“, вели Рамчиловиќ.
Шкријељ и Рамчиловиќ велат дека не чувствуваат потреба никому да докажуваат кои и што се и не бараат од пратеничката да се извини, туку тоа треба да го направи ВМРО-ДПМНЕ и да се огради.
„Не чувствуваме потреба никому да докажуваме кои сме и што сме, и нема да ја повикаме пратеничката да се извини, таа го кажа своето за што доби и аплауз од пратеничката група на ВМРО ДПМНЕ, но упатуваме јавна реакција и барање до партијата ВМРО ДПМНЕ да се извини и да се огради од кажаното доколку има демократски капацитет и го почитува Уставот и законите на Република Северна Македонија“ велат двајцата пратеници во реакцијата.
Веруваме, додаваат тие, дека говорот на Стојкова-Серафимовска не е партиски став на ВМРО-ДПМНЕ, но порачуваат дека во зависност од партиската реакција за говорот на пратеничката ќе зависи и односот на Бошњаците кон партијата.
