ВЕСТ НА ДЕНОТ
„Имав можност да студирам во Словенија и имав прилика да научам многу повеќе за европските вредости. Кога на 18 години отидов во Словенија имав потешкотии да се прилагодам. Промените што се случуваа во време на Шарената револуција ја следев од таму. Во однос на дигитализацијата, имаме можност да растеме. Нема оправдување дека не може нешто да се смени и да кренеме раце. Не смееме да кажеме „пиши пропало“, мора да се бориме за поздрава средина и поубави можности“, изјави Билјана Арсовска на јавниот настан на ЦИВИЛ на тема „Младите и европските вредности“.
Билјана Стојческа од Младински сојуз на Крушево, на јавниот настан на ЦИВИЛ истакна дека не зборуваме за ЕУ како институција, туку за евриопските вредности, и откако ќе се усвојат европските вредности дури тогаш може да зборуваме за ЕУ интеграции.
„Преку сите наши проекти промовираме европски вредности. Што ние правиме за младите? Убедена сум дека прво треба тука да почнеме да се сакаме, да им покажеме на ЕУ дека сме спремни да не примат во својата кујна. Младите се двигатели на промените.
Андреј Стојкоски од Национален младински совет на панелот истакна дека младите луѓе веруваат во европските вредности и знаат што се европски вредости, ги применуваат тие вредности.
„Би рекол дека има мала бројка млади не се запознаени со европските вредности. Младите не ни знаат дека вредостите што ги носат во себе се токму европските вредности.
Сметам дека треба да се посвети поголемо внимание на оваа тема, во имплементација на европските вредности, за младите целосно да ги применуваат, изјави Стојкоски.
ИЗЈАВА НА ДЕНОТ
„Овој Извештај за спроведена проценка за ризикот од финансирање на тероризам за непрофитните организации во нашата земја влева надеж дека со имплементација на препораките ќе го направиме системот посилен и поподготвен да се справува со заканата од тероризам и нелегалните извори за негово финансирање. На тој начин ќе ја зајакнеме довербата на граѓаните и на нашите европски партнери во капацитетот и интегритетот на надлежните домашни институции како клучни носители на концептот на добро владеење. Македонската јавност треба да биде соодветно информирана и едуцирана во врска со дејствувањето на непрофитните организации, кои пак, треба и самите да ги зајакнат сопствените капацитети за препознавање на ризиците кои произлегуваат од перењето пари и финансирањето тероризам“, изјави Пендаровски.
ФЛЕШ ВЕСТИ
ДИЗАЈН Креативни дизајни – фустани и костуми создадени од студентите од факултетите за дизајн од целата држава, со употреба на само еколошки материјали, беа промовирани вечерва на одржливата модна ревија во Музејот на современа уметност.
САМИТ Премиерот Заев на Самитот на земјите од Западен Балкан во Тирана.
НАРЕДБА Со Извршна наредба на претседателот на САД Џо Бајден вчера се прошири опсегот на вонредни мерки за регионот на Западен Балкан, што опфаќа и замрзнување на имотот и забрана за влез во САД на лица кои работат против Договорот од Преспа и Охридскиот рамковен договор и нивното спроведување и ги поткопуваат мирот и регионалната соработка.
ЛЕТЕН РАСПУСТ Учениците одат на распуст, надлежните ќе решаваат како ќе продолжи наставата од септември.
ДЕН НА ВОЗДУХОПЛОВСТВО Со воена свеченост во касарната „Страшо Пинџур“ во Петровец денеска армискиот воздухопловен ВИНГ (вВИНГ) ќе го одбележи Денот на единицата.
Десет НАТО сојузници меѓу кои и Северна Македонија стартуваат нова ера во обуката на воени пилоти.
МЕДИУМИ Во 2020 година зголемен број на напади врз новинари и слаб напредок во медумските слободи.
ПЕРСОНА НОН ГРАТА Русија протера вработен во амбасадата на Република Северна Македонија во Москва како одговор за протерувањето на руски дипломат од Скопје.
ДКСК Државната комисија за спречување на корупција на 49 седница согласно член 20 став 2 од Законот за спречување на корупцијата и судирот на интереси ја избра м-р Ирена Поповска, долгогодишен вработен раководен државен службеник во Секретаријатот на ДКСК за Генерален секретар на Секретаријатот во ДКСК.
СЛОБОДНА ЗОНА
Во денешниот едиторијал под наслов „Одат во војна против Брисел и Вашингтон, а блокираат сообраќајници со двајца без тројца“, Џабир Дерала пишува: „Ако е нејзин гласот на снимките што се објавуваат деновиве, Јелена Жугиќ ја одигрува својата животна улога. Таа и нејзината партија не се борат против Заев, туку против Брисел и Вашингтон. И потврдува дека тоа што го говори на снимките се мисли и ставови на нејзиниот претседател, Мицкоски кој, ако си замине, сите ќе заминат, а партијата ќе им ја преземат криминалци. „Ни го осудија Груевски за мерцедесот…“ – вели таа, растреперена, возбудена, патетична… Нема потреба да се аргументира посебно, доволно е само да се преслуша снимката, за да се сфати дека ВМРО-ДПМНЕ има голем проблем. Многу голем проблем. За среќа, колку и да се трудат, проблемот не успева да се излее од нивното заматено партиско корито. Сепак, Мицкоски мора да се одлучи, дали не спие поради Заев или поради Брисел и Вашингтон…“
Ирена Крџиќ