Лидерската средба, која се одржа вчера, продолжува вo недела навечер или понеделник наутро.
Учесниците на вчерашната лидерска средба не постигнаа договор, но како што изјавија по завршувањето на состанокот за некои прашања се приближиле, но за некои имало потешкотии во изнаоѓање заеднички став.
Заев потенцира дека компромиси не може да се прават околу стратешките цели на Македонија – влез во ЕУ и НАТО и за амнестијата, додека Мицкоски побара европско однесување не само на зборови, туку со дела.
Мицкоски по завршувањето на лидерската во изјава пред новинарите нагласи дека е разговарано за теми кои веќе и се познати на јавноста, а се дел од преговорите од март-април.
„Ја користам оваа прилика да кажам определен мој впечаток којшто не се темели на чувства, туку на заложби на ВМРО-ДПМНЕ, а тоа се вистинските европски вредности и принципи, а не само декларативни заложби. Доколку навистина се стремиме кон европските вредности и принципи така треба и да се однесуваме и истите заложби да ги применуваме во дело. Тоа подразбира почитување на законите и на Уставот и да превенираме каков било обид да се изигра волјата на граѓаните односно да се поставуваат повеќесмислени прашања за круцијални теми за кои ние како граѓани сме загрижени за иднината на оваа држава“, посочи Мицкоски.
ВМРО-ДПМНЕ, по завршување на синоќешниот состанок на Извршниот комитет на партијата, соопшти оти останува на своите ставови дека пред секои избори треба да се избира техничка влада и побара реализирање на веќе договорените концепти за финансирање на партиите.
„Само на овој начин избирачите ќе имаат гаранција дека власта нема да го злоупотреби нивниот глас, односно дека опозицијата ќе има можност соодветно да дејствува при сите обиди за можен фалсификат“, стои во соопштението на ВМРО-ДПМНЕ.
Собраниската Комисија за европски прашања денеска ја продолжи седницата на која единствена точка на дневен ред се предлог измените на Изборниот законик, кои се носат по скратена постапка. На седницата треба да бидат разгледани 401 амандман поднесени од пратениците од опозициската ВМРО-ДПМНЕ.
Седницата, започна вчера, во тензична атмосфера. Пратениците од ВМРО-ДПМНЕ побараа таа да се одложи од деловнички причини бидејќи не биле архивирани ниту преведени поднесените амандмани. Претседателот на комисијата Артан Груби, сепак, ја отвори седницата и најави дека ќе закаже продолжение штом бидат преведени амандманите.
Комисиската расправа треба да заврши денеска, бидејќи според Деловникот, за закони кои се донесуваат по скратена постапка и со европско знаменце треба да трае два дена.
Со измените се предвидува избор на членови на ДИК да се изврши со 61 пратеник, наместо со двотеринско мнозинство. ДИК треба да го организира спроведувањето на референдумот кој е обврска од Договорот од Преспа.
Управителот на компанијата „Трансмет“ Сеад Кочан денеска во Кривичниот суд Скопје е осуден на шест години затвор за злоупотреба на постапката за јавен повик, доделување договор за јавна набавка или јавно-приватно партнерство, односно дека со лажни документи учестувал и добил тендери за ископ на јаглен и јаловина во РЕК „Битола“ на АД ЕЛЕМ вреден 17 милиони евра, за што го товареше Специјалното јавно обвинителство.
Второбвинетиот Василие Авировиќ, во свпојство на управител на фирмата „Силекс неметали СТ“ за истото дело доби три години затвор. Тој денеска не присуствуваше на изрекување на пресудата бидејќи не се чувствувал добро.
А. П.
