Четири лица загинаа, а уште 32, меѓу кои и едно дете, беа повредени во руски ракетен напад врз Лвив, западна Украина, пренесува Укринформ.
„Четири лица загинаа, а 32 (од нив едно дете) се повредени како резултат на руски ракетен напад. Спасувачките операции се во тек“, објави Министерството за внатрешни работи на Украина на Телеграм.
Според Серхиј Крук, шеф на Државната служба за вонредни состојби, како резултат на нападот биле уништени третиот и четвртиот кат во двата дела на четирикатната станбена зграда. Седум лица се спасени, а 64 лица се евакуирани.
Претседателот на Украина, Володимир Зеленски, сподели видео на кое се прикажани последиците од ноќниот руски ракетен напад врз градот Лвив.
„Лвив. Последици од ноќниот напад на руските терористи. За жал има повредени и загинати. Сочувство до роднините!“ напиша тој покрај видеото објавено на Телеграм, пренесува Укринформ.
„Дефинитивно ќе има одговор на непријателот. Конкретен“, увери Зеленски.
Ноќта на 6 јули, Русија повторно ја нападна Украина со ракети „Калибр“, лансирани од Црното Море. Од 07:00 часот, четири лица загинаа, а уште девет се повредени откако беше погодена станбена зграда во Лвив.
Подготви: Д. Мишев