Кривичниот суд за 24 часа треба да реши по барањата за определување на мерки за претпазливост и притвор за сите обвиненија на Специјалното јавно обвинителство.
Јавноста е во исчекување – дали ќе има притвор за десетина функционери на ВМРО ДПМНЕ или повторно, како што беше случајот досега, ќе бидат ослободени и пуштени да се бранат од слобода.
Судиите кои ќе решаваат по предметите од СЈО се Лидија Петровска, за случаите „Тврдина 2“, со првоосомничениот Горан Грујовски и „Транспортер“, во кој првоосомничен е Владимир Талевски, Татјана Михајлова, за случајот „Шамари во Центар“, во кој се обвинети Никола Груевски, Миле Јанакиевски и Даниела Рангелова, Горан Бошевски ги презеде обвиненијата за случаите „Трезор“ и „Тенк“, Верка Петковска за случајот „Титаник 2“ и Ленка Давитковска – го доби обвинението за „Топлик“. Посебно е интересен случајот со судијката Моника Бахчовановска на која компјутерот ѝопределил да ги води обвиненијата за дури пет случаи „Тотал“, „Тревник“, „Тифани“ во кој се обвинети Драган Павловиќ и Ивона Талевска, „Титаник“, во кој е обвинето раководството на ВМРО ДПМНЕ за изборни злоупотреби и „Тортура“, во кој е обвинет Сашо Мијалков и припадници на „Алфите“ за апсењето на Љубе Бошковски и негово измачување, а ниту еден друг предмет не бил распореден кај било кој од над 20 судии на одделот за кривично полнолетни лица.
Сите обвиненија на Специјалното јавно обвинителство се примени во судот вчера. На една од судијките кај која беа распоредени неколку предмети ѝ се слошило и неофицијално побарала да биде изземена од постапувањето поради краткиот рок за одлучување. Барање за изземање поднела и судијката, Софија Лаличиќ која го доби епитетот „сваровски“, по снимките од разговорот со ексдирекорот на УБК, Сашо Мијалков.
По вчерашната прес-конференција на Никола Груевски, на која истакна дека се води политички, а не правен процес против ВМРО – ДПМНЕ и се закани дека нивната „конструктивност завршува денес“, симпатизери на оваа партија ја блокираа улицата пред Основниот суд Скопје 1.
На прес-конферецијата на СЈО, вчера, обвинителката Катица Јанева изјави дека се поднесени 17 обвиненија за 18 предмети. СЈО бара притвор за десетина функционери на ВМРО-ДПМНЕ, но и за еден пратеник на ДУИ, обвинет во „Титаник“.
Со обвиненија се опфатени 94 лица и 7 фирми. Обвинетите во овие предмети се товарат за над 20 различни кривични дела, вклучувајќи и злосторничко здружување, даночно затајување, злоупотреба на средствата за финансирање на изборната кампања, повреда на избирачкото право и уништување на изборен материјал.
