Редакцијата на ЦивилМедиа вчера го постави редовното прашање на денот, овој пат за благодарниците на министерот за внатрешни работи, Панче Тошковски.
Повод за ова прашање е доделувањето благодарници на полицијата, и на министерот во време кога општеството се соочува со исклучително нарушена безбедност, убиства по улиците, во време кога се случи катастрофалниот пожар во Кочани со над 60 изгубени животи, вооружени пресметки на криминалци, нерешени убиства… Им нема крај!
Прашањето „Што мислите за БЛАГОДАРНИЦИТЕ на Тошковски“ доби интересни одговори, имајќи предвид дека јавноста секојдневно бара одговорност од соодветните институции кога се работи за безбедноста, и во прв ред, кога се работи за редот и мирот низ целата земја, кој ред е длабоко нарушен.
Од одговорите на граѓаните сепак може да се заклучи дека се загрижени и свесни за безбедносниот хаос во кој живееме сите.
Еден од одговорите гласи – „Бруки, а зошто му дал благодарница и Мицко не знае ,за секојдневните убиства, педофилија, за случката во Кочани, секој ден сообраќајки…“
„Катастрофа“, велат граѓаните. Други велат „Благодарниците се нарачани“, еден во еден од одговорите се посочува дека благодарниците се за да не си даде оставка министерот.
Имено, На 7 мај, во Центарот за обука на МВР во Идризово се одржа централната манифестација по повод 7 Мај – Денот на македонската полиција, на која присуствуваа претседателот на Владата Христијан Мицкоски, министерот за внатрешни работи Панче Тошковски, директорот на Бирото за јавна безбедност при МВР Александар Јанев, раководството на министерството, министри и членови на дипломатскиот кор.
По воведните обраќања, од страна на раководството на МВР беа доделени плакети и благодарници на најдобрите полициски службеници од различни полициски организациони единици за промоција на професионализмот и реализирани оперативни активности, институции и дипломатски претставништва во државата, а премиерот Христијан Мицкоски му додели благодарница на министерот за внатрешни работи Панче Тошковски и порача дека „нема веќе место за врски, непотизам и заштита од одговорност“.
И сето ова, кога во само две недели се случија две убиства со пиштол во Скопје и Штип, едно убиство со нож во Шуто Оризари и едно убиство со секира во кичевско Србјани. Едно „убиство во обид“ со метален капак од шахта во Скопје.
Да не заборавиме и на нерешените случаи на убиства, речиси секојдневните сообраќајни несреќи ( и покрај тврдењата на МВР дека несовесните возачи се казнуваат)… Безбедноста на граѓаните би требало да е на приоритетната листа на властите, а благодарниците – кога граѓаните ќе почувствуваат дека се безбедни, ќе ги достават самите до одговорните, впрочем, чесната работа во служба на граѓаните сама по себе би требало да биде благодарност.
Редакцијата на ЦивилМедиа, ги охрабрува граѓанките и граѓаните да дадат свои одговори, пораки и сугестии на прашањата на денот, и е простор во кој секогаш можат да се обратат со свои прашања, коментари, споделување искуства, критики или пофалби.
Сите прашања на денот може да се најдат во рубриката ФОРУМ на интернет весникот ЦивилМедиа.
Д. Т.
