Тендерот за паркинг и изградба на катни гаражи во Клиничкиот центар ги помина сите процедури и досега нема потврдено ниту една нерегуларност. Договорот со компанијата од Албанија „Ѓока Констракшан“ се уште не е потпишан, потврди министерот за здравство Арбен Таравари.
„Не сме го потпишале, треба да помине на Влада, па во Влада треба да се видат, да помине одредени филтри коишто ќе ги видат сите потребни документи. Дека треба паркинг во клинички центар, тоа никој не спори околу тоа. Што побргу да има, толку подобро, меѓутоа мене многу ми значи и гласот на јавноста, искрено многу ми значи. Иако сега некои викаат цената од 50 денари била многу, јас мислам дека во повеќето градови е 50 денари паркинг било каде“, рече вчера Таравари.
Следејќи ја темата, ЦИВИЛ Медиа го постави прашањето на својата Фејсбук страница – Што мислите за договорот на Владата со албанската компанија „Ѓока“ за паркинг на Клинички со 1% добивка?
Од коментарите на граѓаните може да се заклучи дека оваа ситуација изгледа како еден вид сатира. Се чувствува огорченост од луѓето кои имаат функции и од тоа како тие ги користат за лични или партиски интереси.
Ви пренесуваме само дел од коментарите:
„Бонбона бизнис“
„На Ѓока треба да му се дадат сите паркинзи, многу добра компанија со меѓународно реноме, а на Мока да му се даде нешто друго, владата, на пример, да управува со општиот клинички центар што се вика Македонија“!
Имаше и такви кои го отворија прашањето како (ќе) се однесуваат со лицата со хендикеп.
„Јаката компанија нема што, гради мостови од стиропор кои потоа се срушиле. Баш ме интересира како ќе се однесуваат со лицата со хендикеп на кои паркирањето треба да им е бесплатно, ако претходните користеа пајак за да манифестираат сила на девојка во количка со наплата, овие пак ќе те одерат до гола кожа“…
Но, имаше и такви кои велат дека „ќе се снајдат со паркинг“ пред Клинички – „Ќе ги оставиме колите на улица и ќе земеме количка од болница за да ги однесеме болните или ќе викнеме Брза помош“.
Д.М.
Фото: ВИ
