Романскиот премиер Марчел Чолаку го поддржа поништувањето на претседателските избори од страна на Уставниот суд.
„Оваа одлука е единствената правилна по откривањето на документи кои покажуваат вмешаност на Русија во изборниот процес“, напиша Чолаку на Фејсбук.
Тој повика на истрага за утврдување на одговорните, нагласувајќи дека довербата на јавноста во институциите зависи од транспарентноста на овој процес.
Кандидатката за претседател на Романија од „Алијансата за спас на Романија“ (USR), Елена Ласкони, остро го осуди денешното поништување на првиот круг од претседателските избори од страна на Уставниот суд.
– Остро осудувам тоа што се случи. Тие го уништија она за што се боревме 35 години. Одлуката е незаконска и го понижува самото гласање, суштината на демократијата, рече Ласкони.
Таа додаде дека Романија мора да продолжи со изборниот процес и да го почитува гласот на деветте милиони Романци, без разлика на исходот.
– Знам дека ќе победам и ќе се борам за обединување на Романците, изјави таа.
Романскиот Уставен суд денеска ги поништи претседателските избори, чиј втор круг требаше да се одржи в недела, во атмосфера на големо сомневање за руско мешање.
Објавено е дека судот го поништува целиот процес за избор на романскиот претседател за да се увери во валидноста и законитоста на изборите и бара повторно да почне целиот изборен процес.
Одлуката беше донесена само два дена откако е укината тајноста на разузнавачките документи кои укажуваат на тоа дека Русија водела координирана онлајн кампања за промовирање на екстремно десничарскиот аутсајдер кој победи во првиот круг.
Документите на романските разузнавачки агенции покажаа дека имало „агресивни хибридни руски напади“ во Романија за време на изборниот период, а победата на десничарскиот кандидат Калин Герогеску беше резултат на координирана кампања на социјалните мрежи.
Романската Дирекција за истрага на организиран криминал и тероризам (DIICOT) отвори истрага за компјутерски криминал поврзан со претседателската кампања на Калин Георгеску, крајнодесничарски независен кандидат.
Според разузнавачките податоци презентирани на седница на Националниот совет за одбрана, Романија била мета на руски хибридни напади.
„Како резултат на анализата на информациите од (декласифицираните) документи кои беа презентирани на седницата на Врховниот совет за национална одбрана на 28.11.2024 година, во врска со спроведувањето на изборниот процес за функцијата Претседател на Романија, обвинителите од Дирекцијата за истрага на организиран криминал и тероризам се самоупатуваат на истрага на следниве кривични дела: незаконски операции со информативни уреди или програми, обид за кривично дело со нарушување на функционирањето на информатичките системи и обид за нелегален пристап до информациски систем“, се наведува во соопштението на Управата за истраги за организиран криминал и тероризам.
DIICOT истакна дека моменталната фаза е само за собирање докази и не подразбира формулирање обвиненија.
Ј. Ѓ.
