На традиционалниот годишен прием за претставниците на дипломатскиот кор, претседателката на Северна Македонија, Гордана Сиљановска-Давкова, во својот говор пред дипломатите ја нарече бруталната руска воена агресија против суверена Украина со израз кој како да е диктиран од руската амбасада: „руска воена операција“.
Во говорот пред дипломатите, претседателката Сиљановска-Давкова, исто така, го употреби изразот „руско-украинска војна“, иако се работи за војна на агресија или злосторство на агресија, што во литературата се опишува и како „фундаментално злосторство“.
Римскиот статут на Меѓународниот кривичен суд се однесува на кривичното дело агресија како едно од „најтешките злосторства што ја засегнува меѓународната заедница“ и предвидува дека кривичното дело спаѓа во надлежност на Меѓународниот кривичен суд (МКС).
Универзитетската професорка, сега и претседателка на државата, при Правниот факултет „Јустинијан Први“ која, меѓу многуте други, го предава и предметот „Суверенитет – теорија и пракса“, едноставно, не направи разлика меѓу руската воена агресија каква што е позната во целиот свет и изразот „руската воена операција“, својствен на рускиот воено пропаганден вокабулар од почетокот на целосната воена агресија во 2022 година.
На почетокот, „специјална воена операција“ или „воена операција“ беше единствен дозволен израз со кој руските пропагандисти, но и обични луѓе, смееја да ја наречат руската воена агресија. Не смееја ни зборот војна да го употребат – се одеше в затвор за тоа.
За разлика од почетокот на агресијата, дури ни рускиот злосторнички режим веќе не успева да најде оправдување за казнување на своите граѓани и новинари кога го спомнуваат зборот војна.
Но затоа тука е претседателката на Северна Македонија да „потсети“ и да ги воскресне пропагандните наративи на злосторниците од Кремљ. На дипломатски прием!
Џабир Дерала
Текстот е личен став на Авторот – Редакцијата и Издавачот не сносат одговорност за изречените ставови.
