Руските сили веројатно егзекутирале уште еден украински воен заробеник, изјави омбудсманот Дмитро Лубинец на 1 јули, осврнувајќи се на неодамнешното видео кое се чини дека го прикажува заробеникот врзан за мотоцикл и влечен по патот.
Какошто пренесува Кијив Индипендент, наводната егзекуција е дополнителен доказ дека руските сили систематски ги кршат Женевските конвенции со убивање украински заробеници.
„На социјалните мрежи циркулира видео на кое се гледа како човек е врзан за мотоцикл и влечен по патот“, рече Лубинец во соопштението.
„Тоа е јасен чин на демонстративна суровост и уште едно воено злосторство од страна на Руската Федерација.“
Лубинец рече дека испратил официјални писма во врска со осомниченото воено злосторство до Обединетите нации и Меѓународниот комитет на Црвениот крст (МКЦК).
„Русија се однесува како терористичка држава. И мора да биде одговорна за секое злосторство“, додаде тој.
Само украинската воена разузнавачка агенција (HUR) во мај објави дека документирала повеќе од 150 случаи на украински војници кои биле погубени откако се предале на руските сили. Службениците забележаа дека ова се само потврдени инциденти, а вистинскиот број е веројатно поголем.
HUR и други агенции велат дека ваквите егзекуции не се изолирани, туку се дел од поширока, намерна политика водена од военото раководство на Русија. Повеќекратни разузнавачки извештаи сугерираат дека руските војници добиле експлицитни наредби да убиваат воени заробеници.
Независната меѓународна комисија за истрага на Обединетите нации за Украина во март потврди растечки број инциденти во кои руските сили убиле или осакатувале украински војници кои се предавале.
Комисијата се повика на сведоштва од руски дезертери кои рекоа дека им било наложено да не земаат заробеници, туку да пукаат во нив веднаш штом ќе се појават.
Порано оваа година, Мисијата за следење на човековите права на ОН во Украина објави нагло зголемување на егзекуциите на воени заробеници, документирајќи 79 убиства во 24 инциденти од август 2024 година. Во многу случаи, жртвите биле невооружени или ранети, а некои биле убиени во групи.
Д. Мишев
