Проф. д-р Светомир Шкариќ во разговор со ЦИВИЛ Медиа за Перспективи 2018, зборуваше за очекувањата од новата Влада во однос на граѓаните и институциите, пред сѐ, судството и Собранието.
„Држење до дадениот збор е најголемиот капитал за секого што сака да ослободува и да ги шири хоризонтите на слободата. Ако отстапува од кажаниот збор тогаш веќе го губи кредитот, кредабилитаетот што македонскиот народ, во оние бурни настани, својствени за минатата година, го има дадено. Новата власт мора да тежнее кон римискиот идеал што го пропишал своевремено поетот Вергилиј.
Римјанинот т.е. во овој случај Македонецот, мора да научи да владее со народите, да има чувство кон народот. Потоа тоа да му биде уметност, дури да ги штеди победените, но, без никаков услов, да се насочи кон донесување на праведните закони“, изјави универзитетскиот професор Шкариќ.
„Претходната власт бегаше од науката, не би сакал и оваа власт така да се однесува. Знакот дека се бега од науката или дека се бега од струката е најдобар индикатор дека власта оди по криминална патека. И обратно, ако се сврти кон науката и струката, тоа ќе е знак дека власта сака да владее праведно“, објасни професорот Шкариќ.
Тој очекувадека дека во оваа година ќе се постигне целото право да биде – судско право, посебно Уставното право.
„Правото мора да биде јуридизирано за да може да биде контрабаланс на политичката власт. Во таа јуридизација, клучна улога треба да одигра Уставниот суд, но не ваков каков што е сегашниот“, заклучи професорот.
„Перспективи 2018“ е дел од проектот „Слободни медиуми за слободно општество“, финансиран од Министерството за надворешни работи на Сојузна Република Германија.
Маја Ивановска
Камера: Дехран Муратов
Обработка на текст и фотографија: Биљана Јордановска