Денеска е 1,494-ти ден од почетокот на целосната тридневна руска инвазија против Украина. Ноќта меѓу 27 и 28 март Русија изврши еден од најмасовните напади со беспилотни летала од почетокот на годината, објави RBC Ukraine. Над 270 дронови беа лансирани кон украинска територија, од кои најголем дел беа пресретнати, но дел од нив предизвикаа смрт, разрушување и страв.
Особено тешко беше погодена Одеса – стратешки град, но и симбол на украинската отпорност. Погодени се станбени згради, инфраструктура и – повторно – здравствени установи, вклучително и едно породилиште.
Иако украинската противвоздушна одбрана пресретна повеќе од 250 дронови, десетици успеаја да погодат повеќе цели, при што пет лица го загубија животот, а најмалку 13 беа ранети, според пишувањето на The Kyiv Independent.
Доказ дека станува збор за систематски терор врз цивилното население доаѓа и од дипломатските извори. Амбасадорката на Украина денеска објави:
„Ноќеска, рф изврши масовен напад врз Одеса. Меѓу целите на руските варвари беше и породилиште. Родилките, вклучително и оние кои се наоѓаа на интензивна нега, како и новороденчињата беа итно префрлени во засолниште. Уништени се повеќекатни станбени згради. Има загинати. #StopRussia“
Ноќеска, рф изврши масовен напад врз Одеса. Меѓу целите на руските варвари беше и породилиште. Родилките, вклучително и оние кои се наоѓаа на интензивна нега, како и новороденчињата беа итно префрлени во засолниште. Уништени се повеќекатни станбени згради. Има загинати#StopRussia pic.twitter.com/eh3m3pA0dZ
— Larysa Dir (@dir_larysa) March 28, 2026
Овој опис не е реторика. Тој е конзистентен со реалноста и државната стратегија на Кремљ за напади врз цивилите и цивилната и здравствената инфраструктура, која со години се документира.
Евиденто е дека рускиот агресор започна со пролетната офанзива. Паралелно со тоа, руската пропаганда работи на нормализација на војната и истиснување на Украина од меѓународната јавност и од политичките агенди на Западот, преку нормализација на војната.
Русија не се обидува да победи брзо. Таа се обидува да победи долгорочно. Интензитетот на нападите – со стотици, па дури и илјада дронови во кратки временски периоди – покажува дека Москва се потпира на квантитет, притисок и психолошко истоштување, анализира The Washington Post.
Целите на рускиот агресор се јасни – да се уништи енергетската и урбаната инфраструктура, да се деморализира населението и да се принуди Украина на отстапки.
Истовремено, рускиот окупатор продолжува со силен притисок во окупираните територии – не само воен, туку и економски и административен. Тие даваат сѐ од себе да го претворат своето воено присуство од „привремена окупација“ во трајна промена на геополитичката реалност.
Украина, пак, продолжува да се брани и да ги адаптира своите тактики на воената реалност на теренот. Високата стапка на пресретнување на дронови покажува дека системите за противвоздушна одбрана и електронско војување функционираат сè поефикасно. Но тоа не е доволно.
Големиот успех на украинската одбрана против теророт од воздух, го позиционира Кијив како глобален актер во безбедноста, особено во областа на противдронска одбрана, со нови партнерства надвор од традиционалниот западен круг. AP News денеска објави дека претседателот Володимир Зеленски е во посета на арапските држави да ја понуди помошта на неговата земја во одбранбените системи на државите од Блискиот Исток против заканата од дронови што доаѓа од Иран.
Ова е важна промена. Украина повеќе не е само примател на помош – туку и извозник на знаење и безбедносни капацитети.
Важно е да се разбере дека, како и во изминатите години, така и сега – најслабата алка не е на боиштето. Таа е во политиката.
Во западниот блок се појавуваат пукнатини – од различни приоритети до отворени несогласувања за стратегијата кон Русија. Во исто време, вниманието делумно се пренасочува кон други кризи, особено Блискиот Исток. Тоа создава опасен вакуум што рускиот агресор го толкува како сигнал да продолжи уште посилно со своите напади.
Џ. Дерала
