Обезбеден е заем од 55 милиони евра од Европската банка за обнова и развој за изградба на регионални депонии за пет плански региони во земјава. Од ЕУ ќе добиеме и грант средства преку Western Balkan Infrastructure Facility во висина од 22,5 милиони евра, со што државата ќе треба да врати само половина од заемот, изјави министерката за животна средина и просторно планирање, Каја Шукова во „Топ тема“ на Телма.
Таа додаде дека покрај овие пари обезбедени се уште 9 милиони швајцарски франци како грант од швајцарската Влада.
Во Полог ќе се санира депонијата Русина, каде што швајцарската Влада веќе има инвестирано. Оваа депонија може да се користи уште пет години, па во меѓувреме се бара нова локација за нова регионална депонија. Другите четири региони опфатени со проектот се Југозапад и Пелагонија, како и Југоисток и Вардарски регион, истакна Шукова.
Министерката додаде дека за Југозападниот и Пелагонискиот регион изработена е потребната документација согласно европските стандарди и тие депонии ќе се прават со првата транша.
Со заемот ќе се обезбеди основната инфраструктура, трансфер станици, централна депонија и опрема за да може да се собира отпадот. Централната депонија за Југозапад и Пелагонија ќе биде во Новаци, во близина на РЕК Битола, додека централната депонија за Југоисток и Вардарскиот регион ќе биде во Василево, нагласи Шукова.
