Огромните суми пари, десетици и стотици милиони евра и долари странска помош за државата, кои беа на располагање на владата на Груевски и на локалната самоуправа, за 11 години, можеа да направат оваа земја да изгледа подобро. Едноцифрен е процентот што, како помош, го доби граѓанското општество од тие вртоглави суми.
Груевски направи најмалку три работи со странската помош: Прво, ја злоупотреби и приграби за себе и неговите разбојници. Второ, ја злоупотреби и ја трошеше на огромната партиско-полициска и медиумска машинерија со која крадеше избори. Трето, ја злоупотреби и ја насочи кон лобирање во Европа и САД, за сопствени потреби, не за подобрување на меѓународната положба на Македонија. Истовремено, ја злоупотреби и за создавање анти-западен сентимент во земјата.
Така, парите кои дојдоа од странство, како донации и поволни кредити, узурпаторот ги насочи против граѓанките и граѓаните на оваа земја и за кампања во светот. Лесно може да се заклучи дека дел од огромните суми кои Груевски ги дава на лоби групите во Америка, всушност, се американски пари, доаѓаат од даночните обврзници токму на Америка. Валкано и гангстерски, итро, но кратковидо, со ефекти на краток рок. Тоа што нам може да ни изгледа предолг процес, бидејќи ги засегнува нашите животи, на светската политичка мапа е речиси невидлива точка. Но, не поминува. Можеби изгледа итро, но сигурно не е паметно, а последиците се далекусежни.
Неколку функционери во Брисел и во Вашингтон, не можат да ја променат сликата за пустошот кој зад себе го остави расипништвото и насилничкото дивеење. Залудно фрлени пари во странство. Залудно платени судии дома, кои не можат да ја променат вистината и правдата.
Пари фрлени за лудило. Груевски и неговата злосторничка дружина одамна го изгубија контактот со реалноста. Го гледаме видеото каде дрскиот узурпатор вели „имаме настан“, продолжувајќи ја агонијата на оваа земја, но која стана и негова агонија, откако се распадна неговата разбојничка клика. Коментарите беа различни, од тоа дека е полуден и болен, до тоа дека знае што прави. Повеќето се точни, без оглед на тоа колку се спротивни. Дури и оние кои го следеа подзинати до вчера, не можат да го скријат срамот. Узурпаторот нема веќе настан. Настаните го имаат него.
