Во организација на Балканската мрежа за развој на граѓанското општество, а со поддршка на Цивика Мобилитас, регионалната конференција „Улогата на граѓанските организации во унапредување на просторот за нивно делување“ денеска се одржа во Скопје, со цел – размена на добрите практики за мониторинг, застапување, подобрување на одговорноста и соработка меѓу граѓанските организации.
Конференцијата беше тематски поделена на три области: активности за промовирање на поволно опкружување за развој на граѓанското општество, пракса и стандарди за одговорност на граѓанското општество и градење на коалиции за промовирање на граѓанскиот простор.
Организаторите се надеваат дека оваа конференција на претставниците на граѓанското општество од Македонија, од Западен Балкан и од Европа, ќе им помогне нивните организации да бидат поактивни и поефективни во одбрана на граѓанскиот простор.
Конференцијата ја отвори Дени Срискандараџа (Dhananjayan Sivaguru Sriskandarajah), генерален секретар на CIVICUS, Алијанса за граѓанско учество, поставувајќи ги главните прашања што граѓанските организации треба да направат за подобрување, проширување и промовирање со цел заштита на граѓанскиот простор.
На првата сесија говорници беа Александар Кржаловски, извршен дирекор на МЦМС, Тевфик Башак Ерсен, генерален секретар на TUSEV од Трција, Котилда Коста од „Партнерс“ Албанија и Фани Каранфиловска – Пановска од ФИООМ, кои преку сопствените искуства ги презентираа можните активности за подобрување на граѓанското општество и поттикнување на граѓанскиот ангажман и придонес во донесување на одлуки за општествени и демократски промени. Пред сè, ја потенцираа солидарноста и довербата на јавноста, како предности за развој на граѓанското општество.
„Ние, граѓанските организации во Македонија, не сме обединети воопшто… Треба да изградиме механизми кои ќе ја поттикнат солидарноста меѓу граѓанските организации“, изјави Каранфиловска, посочувајќи го негативниот пример на нереагирање и несолидаризирање на граѓанското општество, при нападот на 22 организации финансирани од Фондацијата Отворено општество Македонија, во походот на претходната владејачка партија против невладиниот сектор.
Говорниците на втората сесија, Катја Гунтен, советник за одржливост во Global Standard for CSO Accountability и Илина Нешиќ од БЦСДН, обрнаа внимание на практиките и стандардите за одржливост на граѓанското општество на глобално ниво, преку заедничка соработка на граѓанските организации.
Марина Шкрабало од хрватската организација ГОНГ, ја започна третата сесија „Градење коалиции за промоција на граѓанскиот простор“, истакнувајќи ја потребата од градење доверба и солидарност меѓу претставниците на граѓанското општество, но подеднакво и од градење доверба и од поддршката на граѓаните, споделување на ресурсите со кои располагаат организациите, отвореност кон нови и иновативни форми на активизам.
На третата сесија говорници беа и Ралука Теодор од ЦСДФ (Civil Society Development Foundation) од Романија и Петрус Тоинис, меѓународен тим-лидер од Цивика Мобилитас.
Текст и фото: Биљана Јордановска