Владата на Република Македонија на седницата одржана на 22 август, му предложи на Собранието да ја почне постапката за избор на нов државен јавен обвинител. Така, следниот понеделник во Собранието, меѓу првите точки за кои ќе расправаат пратениците по враќање од годишните одмори, е распишувањето на оглас за именување на нов Јавен обвинител, на местото на разрешениот Зврлевски. До крајот на таа постапка, на функцијата на Зврлевски ќе биде токму вршителот на должност од јавните обвинители, назначен со денешната одлука на Советот за јавни обвинители
Владата препорача дека новиот републички јавен обвинител треба активно да го владее македонскиот јазик, да е работоспособен и да има општа здравствена состојба, да е дипломиран правник со домашна или нострифицирана диплома од странство, да има положено правосуден испит и да има работно искуство од најмалку осум години со потврдени резултати на правни работи, а ако доаѓа од редовите на професорите, да има десетгодишно искуство во предавање на правен предмет од правосудната практика како редовен или вонреден професор.
Согласно член 41 од Законот за јавно обвинителство, Собранието на Република Македонија по предлог на Владата, го огласува именувањето на јавниот обвинител во „Службен весник на Република Македонија” и во најмалку два дневни весника од кои еден од весниците што се издава на јазикот што го зборуваат најмалку 20 проценти од граѓаните кои зборуваат службен јазик различен од македонскиот јазик. Рокот за пријавување на кандидатите е 15 дена од објавување на огласот во „Службен весник”. Советот на јавни обвинители, пак, има рок од 15 дена од денот на прием на документите да даде позитивно или негативно мислење за сите пријавени кандидати.
Потоа, постапката продолжува во Владата која на седница ги разгледува кандидатурите, вклучително и мислењето од Советот на јавни обвинители и треба да донесе одлука за еден од кандидатите за кој претходно постои позитивно мислење од Советот. Донесената одлука оди во Собрание како Предлог решение, а истовремено, се доставува и мислењето на Советот на јавни обвинители. За именување на јавен обвинител Собранието одлучува со просто мнозинство од 61 глас.
Мандатот на државниот јавен обвинител е шест години со право на повторно именување.
