ЏАБИР ДЕРАЛА
Еден од најголемите проблеми на локалните избори во нашата (и не само во нашата) земја е што изборните кампањи се најмалку локални. На различни начини, политичките партии го водат главниот збор и тоа на национално ниво.
ДРЖАВНИТЕ ФУНКЦИОНЕРИ ВО ЛОКАЛНАТА АГЕНДА
Навистина, има напредок во „спуштањето“ на агендата поблиску до локалните прашања на овие локални избори (2021 година), но општиот впечаток е дека се работи за силен напор на национално ниво.
Така, ги добивате премиерот и повеќето министри и други важни владини функционери во агендата на настани во кампањата за локални избори.
ПРЕДВРЕМЕНО ЗАПОЧНАТА КАМПАЊА
Кампањата повторно започна предвремено, но тоа е друга, крајно тревожна приказна за која јас и моите колешки и колеги со години пишуваме и говориме. Политичките партии го кршат и онака многупати крпениот Изборен законик, ја претвораат целата земја во котел со зовриена каша од која никој не излегува поштеден.
Колку и на кој начин тоа ќе се одрази на животот на луѓето, реформите, ЕУ интеграцијата, вакцинацијата, може лесно да се замисли и да се опише со еден збор – лошо.
ОД НАЦИЈА И ИСТОРИЈА ДО ФРАНКФУРТ НА МАЈНА
Еден дел од учесниците во изборната трка, едноставно, немаат локална агенда. Како и да се сврти, иако изборите се локални, агендата речиси исклучиво се базира на „големи“ теми од „национално“ и „историско“ значење.
Се разбира, во настапите дел од кандидатките и кандидатите со „национална агенда“ се гледа обид да се привлечат гласачите пригодно и со локални теми, па се ветува дека секоја општина ќе стане, без малку, Франкфурт на Мајна.
ЕСЕНСКА СЕИДБА НА ОТРОВИ
На десничарските и радикалните националистички структури не можеше да им се погоди подобра клима за есенска „сеидба“ на нивите отрови, започната „со време“, уште во текот на летото.
Авганистанските цивили што ќе бидат згрижени во нашата земја, веднаш станаа мета на црната пропаганда. Заедно со нив и сите „предавници“ што изразија солидарност и им посакаа топло добредојде.
Под изговор дека се загрижени за јавното здравје, дел од хард-кор националистите и антизападните структури ја обновија кампањата за бојкот на пописот кој започна на 5 септември, по петмесечното одложување по барање на десничарската опозиција.
СÈ Е ПАРТИЈА
Локалните избори за политичките партии се само уште еден лост на моќта, многу значаен. Најголем дел од учесниците во македонската плурална демократија не научија да ги одвојат националните од локалните теми.
Сè е партија, а секоја партија е дел од поларизацијата, најчесто по националистичка основа. Меѓуетничките поделби се рефлектираат внатре во етничките заедници, зависно од тоа која политичка партија е националистичка и антизападна или го поддржува мултикултурното општество и европските вредности.
Но, во секој случај, во секоја пора од општественото живеење, останува еден сигурен заклучок – сè е партија.
НЕЗАВИСНИ? МА ДАЈ…
Многумина со радост ја дочекаа „плурализацијата“ на локалните избори оваа година.
Одеднаш, како печурки по дожд, се појавија голем број независни кандидатки и кандидати за локалната власт. Составот на независните листи е прилично шарен, како што и треба да биде. Но…
За жал, под плаштот на независноста, кај дел од нив, се кријат едно чудо директни партиски влијанија, клиентелизам, бизнис интереси и политички пораки што немаат врска со имињата на „коалициите“ и со локалните агенди. За најразлични облици на судири на интереси и да не говориме.
Велам, дел од нив. Другите, со друга мака, појдоа кај гласачите по помош, да се доберат до општинските фотелји.
