Британскиот премиер Кир Стармер вчера повторно нагласи дека ќе продолжи да прави сѐ што може за да ги заштити британските граѓани и да ги поддржи во овој период на глобална неизвесност.
Ова се надоврзува на низа претходни изјави дадени за медиумите и споделени на неговиот профил на социјалните мрежи, каде што тој, меѓу другото, отворено и решително зборува за заканата од рускиот агресор.
Така, во изјавата дадена од Хелсинки, британскиот премиер Кир Стармер најави засилени мерки против руската таканаречена „флота во сенка“, оценувајќи дека Кремљ се обидува да профитира од новите глобални кризи, особено од конфликтот на Блискиот Исток.
Во изјава објавена на социјалните мрежи, Стармер предупреди дека рускиот претседател Владимир Путин „си ги трие рацете“ поради растот на цените на нафтата, очекувајќи дополнителни приходи што ќе ја финансираат војната против Украина.
„Како премиер, мојата прва должност е да ја заштитам безбедноста на земјата и британските интереси дома и во странство“, порача Стармер.
Тој нагласи дека британските вооружени сили добиле овластување да пресретнуваат и запираат руски бродови поврзани со „флотата во сенка“ во британските води – мрежа на танкери што Москва ја користи за да ги заобиколи санкциите и да извезува нафта.
Според британската влада, овие операции имаат за цел да го намалат приливот на средства што ја одржуваат руската воена машинерија.
Мерката доаѓа во време на зголемени геополитички тензии и раст на цените на енергенсите, што, според Лондон, директно му оди во прилог на Кремљ.
Британските власти нагласуваат дека пресретнувањето на овие бродови е дел од поширока стратегија за економски притисок врз Москва и за поддршка на Украина, со цел да се пресечат „валканите профити“ што ја финансираат руската агресија.
Со оваа одлука, Велика Британија прераснува во земја лидер во мерките за заострување на санкциите и за ограничување на руските енергетски приходи, во услови на сè поинтензивна глобална безбедносна криза.
Џ. Д.
