Генералниот секретар на НАТО, Јенс Столтенберг изрази голема загриженост за ситуацијата на северот на Косово и рече дека силите на Алијансата се подготвени да го зачуваат мирот, повикувајќи ги Србија и Косово да се вратат на преговорите со помош на Европската унија, бидејќи тоа е единствениот одржлив начин да се постигне траен мир.
Столтенберг во интервју за германскиот весник „Велт“ посочи дека е многу важно да се вложат дополнителни дипломатски напори во решавањето на косовското прашање.
„Сакам јасно да ставам до знаење дека силите на НАТО се подготвени да го зачуваат мирот на Косово. Нема да дозволиме да се врати насилството од 90-тите години“, истакна Столтенберг, пренесува Косово онлајн.
Во врска со конфликтот во Украина и руската реторика во однос на употребата на тактичко нуклеарно оружје, Столтенберг ги окарактеризира овие закани како „целосно неодговорни“ и оцени дека ризикот Русија да употреби нуклеарно оружје останува низок.
Тој објасни дека Русија ја разбира бесмисленоста на започнување нуклеарна војна, нагласувајќи дека „нуклеарна војна никогаш не може да се добие и никогаш не треба да се започне“.
Говорејќи за очекуваните засилени руски напади врз енергетската инфраструктура на Украина во текот на зимските месеци, Столтенберг ја истакна важноста на системот за воздушна одбрана за заштита на животите на Украинците.
Коментирајќи ги политичките настани во Источна Европа, Столтенберг укажа на неодамнешните избори во Полска и напорите за формирање влада во Словачка.
Тој посочи дека Словачка и Полска се сигурни пријатели на Украина, кои на Кијив му обезбедуваат клучна воена опрема, вклучително и борбени авиони.
Столтенберг изрази уверување дека, без оглед на идните влади во Братислава и Варшава, сојузниците од НАТО ќе продолжат заедно да ја поддржуваат Украина.
Г. Т.