„Денес, стојам пред вас, за вашата посветла иднина. Сакаме оваа земја да биде слободна и безбедна. Сите ваши пријатели сакаат да ве видат во НАТО“, кажа Јенс Столтенбер, генерален секретар на Алијансата, од говорницата на македонскиот парламент денеска.
Столтенберг два пати јасно ги потенцира настаните во Собранието, во април минатата година и кажа дека тие ги шокирале сите членки на НАТО.
Столтенберг кажа дека во НАТО се импресионирани од напредокот од тие настани до сега, особено од градењето инклузивна политичка култура. „Колку поинклузивно е општеството, толку тоа е поуспешно. Каде има добро управување има и истрајност“, рече тој.
Индивидуални слободи и владеење на правото се дел од битието она што НАТО е денес, кажа Столтенберг во својот говор. Како поранешен политичар со долго искуство во Норвешка, тој потенцираше дека разбира со што се соочува државата. Изрази силна подршка за нашите напори за влез во Евроатланските интеграции и НАТО.
„За мене беше горд момент кога гледав како се издига знамето на Црна Гора пред седиштето на НАТО. Но, има доста место за нови знамиња. Импресионирани сме од вашите напори и НАТО сака да успеете.“ – кажа Столтенберг во својот говор во кој имаше низа пофалби, признанија и охрабрување.
Сепак, Столтенберг не испушти да каже дека мора уште многу да се работи: „Убаво е да се биде амбициозен, но мора и да се биде реален. Има уште работи да се завршат. Решавање на прашањето со името. Предолго време тежи ова прашање. Ја поздравувам волјата на вашата влада да се реши ова прашање“. Тој додаде и дека земјите ченки се обврзани со заеднички вредности.
„Ве поздравуваме за истрајување на патот за реформи, вклучително за планот 3-6-9. Усвојуването на Законот за употреба на јазиците е важен чекор. Реформите за надзор и транспарентост за службите за безбедност се добар чекор, меѓутоа очекуваме да се спроведат реформи и во изборите, медиумите… Диверзитетот е сила, не е слабост“, истакна генералниот секретар на НАТО и додаде дека „вратата на НАТО е отворена за нови членови, но преминување на прагот бара сериозна работа“.
Тој ја препозна суштинската улога на граѓанското општество и истакна дека треба да се подобрат добрососетски односи, како што е ратификацијата на договорот со Бугарија.
Генералниот секретар на Алијансата не ги потценува предизвиците со кои се соочува државата и вети дека ќе ја поддржи во напорите.
„Пред 9 месеци се движевте по работ на една карпа, сега се движите кон Евроатланските процеси и НАТО. Вие и ние ги имаме алатките, во НАТО имате вистински пријател“, додаде Столтенберг, кој својот говор го заврши со зборовите: „Во НАТО имате вистински пријател!“
Дехран Муратов