Изложбата и перформансот „Протест(и)“ чиј автор е Александар Кондев, е посветена на сите протестни движења од протестите за Мартин Нешковски, па до Шарената Револуција. Како една од поддржувачите и дел од организаторите на мултимедијалниот настан е и граѓанската активстка и режисерка Ирена Стеријовска.
„Едно од начелата што ме привлекоа да бидам дел од организацијата на овој настан е мотивот на Александар Кондев, како креатор, Шарената Револуција да биде потпишана. Тоа е една од работите што Шарената револуција сама по себе го немаше. Овој настан би можел да прецизира што всушност претставуваше таа и кој сѐ учествувал во неа и кој останал зад нејзините идеали“, изјави Стеријовска.
Стеријовска смета дека ваквото обележување на две години од протестите ќе остане забележано во колективната меморија на сите што секој ден го поминуваа на улиците во борбата за подобро општество. Таа смета дека идејата за изложување на поставката и во Музејот на Град Скопје ќе остави траен белег за идните генерации.
„Им порачувам на сите што се идентификуваа и сѐ уште се идентификуваат со Шарената револуција да дојдат, да се потпишат на фотографиите затоа што таа е нешто што треба да остане во колективната меморија како протестно движење кое успеало да направи општествени промени “ упати повик Стеријовска до сите Шарени да бидат во Жена –борец на 12 април, две години од почетокот на Шарената револуција и заеднички да направат рекапитулација на сѐ низ што поминале, што се променило и на каде треба да се продолжи.
Биљана Јордановска
Камера: Дехран Муратов