Ако деновиве го отворите Фејсбук, ќе помислите дека во Македонија се случила најголемата свадба во историјата на човештвото. Сите се дотерани, сите се насмеани и, што е најважно – сите ја имаат истата слика.
На сликата е Тој. Премиерот. Младоженецот. Стои гордо, со онаа државничка поза која вели „Јас сум Алфата“, а до него, како на подвижна лента, се менуваат ликови со израз на лицето што варира помеѓу восхит на тинејџерка пред поп-ѕвезда и понизност на кмет пред феудалец.
Тоа се „избраните“. Тоа се новите и старите функционери, членови на тела, одбори и комисии.
Текстот под сликите е секогаш ист, како да е пишуван од ист бот со сиромашна меморија: „Благодарам на довербата!“, „Чест ми е!“, „Заедно продолжуваме!“.
Но, она што навистина вреска од тие фотографии не е благодарноста, туку инфериорноста.
Целата сценографија изгледа како Премиерот да се оженил со Македонија (или барем со власта), а сите овие ликови се гостите на свадбата кои чекаат во ред да се сликаат со младоженецот. Редот е долг, се чека и по саат време за таа секунда близина, само за да се добие тој дигитален доказ дека постојат.
Затоа што, да бидеме искрени, без таа слика со Младоженецот, кои се тие?
Сликата со шефот е нивниот „венчален лист“ со кариерата.
Таа фотографија е порака до комшиите, до душманите и до обичниот народ: „Гледајте, тој ме избра мене. Тој ме допре за рамо. Јас сум некој и нешто затоа што Тој дозволи да бидам.“
Тоа е тажната вистина на македонскиот политички менталитет. Функцијата не се доживува како одговорност кон граѓаните, туку како мираз добиен од шефот.
Тие не ѝ се заблагодаруваат на јавноста што ќе ја служат, туку на „сопственикот“ што им дал парче од колачот.
А каде е „невестата“ во оваа приказна? Каде е Македонија?
Македонија е онаа уморна невеста која седи некаде во ќошот, никој не ја ни гледа, никој не се слика со неа. Сите се презафатени да му се умилкуваат на Младоженецот.
Невестата е тука само за една работа – на крајот од веселбата, кога ќе се запалат светлата и ќе си заминат гостите со полни стомаци и полни џебови функции, таа е единствената што ќе остане да го плати цехот за свадбата.
Затоа, драги новоизбрани сватови, намалете малку со сликите. Изгледа грдо. Изгледа како да не верувате во сопствената вредност, па ви треба Премиерот како патерица за вашето его.
