Игор Тантуровски, претседател на Државната комисија за корупција не чувствува никаква одговорност. Напротив, тој смета дека доказите изложени во јавноста не се релевантни. Сепак, подготвува оставка.
Во 24Анализа, Тантуровски, изјавува дека сдк.мк, без разлика кој и да им бил изворот, односно свиркачот, од кого го добиле ревизорскиот извештај пред два месеци, располагаат со информации кои се само препораки, а не наоди.
Имено, Тантуровски вели дека колешките и колегите од сдк.мк го имаат претходниот ревизоски извештај, а не конечниот извештај.
„Работите во најголем дел, да не речам 100% се извадени од контекст и дополнително обработени да изгледаат бомбастично“, образложи Тантуровски, во котекст на приложените докази од сдк.мк.
ЦИВИЛ Медиа, своето разоткривање на корупцијата во Антикорупциска, го базираше на конечниот ревизорски извештај од 26 јануари 2018. Бидејќи нашиот извор ни го обезбеди и претходниот извештај, можеме со сигурност да кажеме дека Тантуровски не е во право.
Најпрвин, изјавата дека претходниот извештај се базира само на препораки, а не на наоди не е точна. Имено и двата извештаи ги имаат и двете ставки: Наоди и препораки.
Ако се споредат двата извештаи, ќе се види дека наодите и препораките се поклопуваат.
Што се однесува до информациите во медиумите дека Горан Миленков, поранешен претседател на ДКСК, а сегашен член, си поднел оставка, го наметнува прашањето под колкав притисок е ДКСК во моментов? Дали има договор на редоследот на оставки или ќе остане само на Миленков, како жртвено јагне? Да потенцираме, неговото име во конечниот извештај е поврзано со бланко патни налози за лица кои веќе не се членови во ДКСК, исплатени и непотпишани од никого.
Ако веќе се бара чија е одговорноста за сите наоди во Конечниот извештај, што се однесува на процесот пресметување и исплата на платите и другите надоместоци на избраните и именувани лица и државните службеници, се вели дека одогворноста е на:
Горан Миленков, претседател на ДКСК до 18 април 2016
Игор Тантуровски, претседател на ДКСК од 19 април 2016
Софка Пејговска Дојчиновска, Државен секретар до 18. септември 2016
Розета Трајан, Државен секретар од 19 септември 2016
Даниела Трајчевска, раководител на одделение за финансиски прашања
Сатула Суљимани, советник
Прашањето е зошто Тантуровски упорно се брани со законските одредби, постојано истакнувајќи дека се донесени во Собранието, а кога истото тоа Собрание го повикува на одговорност и оставка, тој во емисијата 24 Анализа, го поставува прашањето: Сакате да кажете дека јас како официјално лице на таа установа лажам?
Тантуровски не лаже. Само не ја кажува вистината. Или ја извртува во сопствена корист.
Наодите од Конечниот извештај остануваат непроменети како и во претходниот извештај: извршена исплата врз основа на неверодостојни патни налози, при што ненаменски се исплатени буџетски сретства, нема евиденција за работното време на членовите на ДКСК, неверодостојни патни налози, нејасна употреба на возила во лична сопственост за службени цели, нема процедура за репрезентација, а исплатени се репрезентативни трошоци… Нетранспарентноста и да не ја споменуваме.
Тантуровски треба да одговори и за неговата невистинита (без обвинение дека е лажна) изјава на интереси, за која ЦИВИЛ Медиа веќе објави. За потсетување, станува збор за вршење две државнички функции истовремено. Едната како член во ДКСК и другата као член на Управен одбор на ЈЗУ Здравствен дом Железничар.
Значи, оставка, кога?
Биљана Јордановска
