„За жал денес никој не е сигурен ниту заштитен од терористички напади. Но можете да имате некои информации однапред. Тоа е она со што располагате кога сте членка на НАТО. Нема 100 посто заштита од ништо. Полесно е кога знаете дека некој е со вас“, изјави амбасадорката на Хрватска, Данијела Баришиќ, на прашањето на ЦИВИЛ, дали постои можност за тероризам.
Министерката за одбрана Радмила Шекеринска се надоврза на прашањето за дали постои можност за тероризам пришто одговори дека опасноста од тероризам е глобален феномен.
„Најголемите закани по безбедноста на членките се наоѓаат многу далеку од нивните граници. Членството нема да не заштити од опасноста, но ќе не подготви. Членството ги развива побрзо капацитетите. Во таа мрежа на размена на информации може полесно да превенираш. Еден од аргументите кои треба да ги искористиме е и фактот дека Македонија се наоѓа во регион каде поминуваат тие канали врзани со тероризам. Битно е да се развијат нашите институции. Владата создаде едно ново тело чија цел е борбрата против вакви ризици. Тоа е еден од приоритетите“, истакна Шекеринска.
Аналитичарот Сашо Орданоски додаде дека борбата против теророизам се темели врз добро разузнавање.
„Ние не сме ни почнале како што треба. Што правиме со реформите на тајните служби. Таа реформа ни е еден од условите. Треба да се ослободиме и тајните служби да почнат да си ја вршат работата. Кумановскиот инцидент. Фактот што постои „црвен телефон“ овозможи тој инцидент да биде релаксиран од регионални компликации. Тоа да се случеше во 90 години ќе беше катастрофа“, рече Орданоски.
Шекеринска на состанок со една членка на НАТО се заблагодари за важни оперативни податоци кои преку Македонија биле испратени и спречиле загрозување на безбедноста во таа земја.
„Нема само да се даваат информации туку и пристап до истите“, додаде таа.
Стево Пендаровски истакна дека Македонија не е мета на терористички напади, бидејќи не е клучна држава. Самото членство не значи ризик плус.